Буряад Уласай Мухар-Шэбэрэй аймагта Түгнын дасанай дэргэдэ зочид буудал баригдажа байна, мүргэлэй ёһололдо ерэһэн СВО-гой хабаадагшад тэндэ түлбэригүйгөөр байрлаха аргатай. Августын 5-да Буряад Уласай толгойлогшо Алексей Цыденов дасан ошожо, албан ажалайнгаа аяншалгые эхилээ. Иимэ нэрэтэй ТОС-ууд эбээн тэдхэгшэдэй мүнгэ зөөри болон Буряад Уласай засагай газарай үнгэргэжэ байһан уласай ТОС-уудай мүрысөөндэ шүүһэн шангуудые хэрэглэн, дасан болон зэргэлээд байһан дэбисхэрые һайжаруулна.
Бүхыдөө 2019 онһоо хойшо эдэ хэмжээ ябуулгануудта ТОС 500 мянга гаран түхэриг татажа шадаа. Тиихэдэ тэдэндэ Согшон дуганай һэльбэн шэнэдхэлгэдэ грантын мүнгэн һомологдоо. Дасан һүзэг этигэлэй, ёһо заншалта хүмүүжүүлгын талаар эдэбхитэй ажал ябуулна. "Грантнуудаар бидэниие нютагаархид, улас дэмжэнэ: Согшон дуганиие һэргээхэ талаар уласай грантда хүртөөбди. Мүн тиихэдэ ТОС хүдэлөөнэй ашаар ехэ ажал ябуулагдана – гансашье дасанай дэбисхэр дээрэ бэшэ, харин һууринда", - гэжэ тэдэ дасанда хэлэбэ.
Буряад Уласай толгойлогшо Алексей Цыденовэй хэлэһээр, мүнөөдэр ламанар сэрэгшэдтэ - СВО-гой хабаадагшадта һүзэг этигэлэй дэмжэлгэ үзүүлнэ. Мүн ТОС-ой эдэбхитэд соёлой болон олониитын хэмжээ ябуулгануудые эмхидхэжэ, залуу үетэнэй оюун сэдьхэлэй хүмүүжүүлгэдэ, хүгжөөлгэдэ хабаадалсажа, элүүр энхэ ажабайдал дэлгэрүүлхэ талаар ехэ ажал ябуулна.
- Дасан манай СВО-до хабаадагшадые дэмжэнэ, мүнөө дасанда зочид буудал баригдажа байна, тэндэ сэрэгшэ бүхэн огто түлбэригүйгөөр байрлажа, зальбаржа, һүнэһэ һүлдэеэ һэргээхэ аргатай. Бэрхэнүүд байнат, иимэ зоной хажууда байхада - газарнай бата бэхи, - гэжэ Буряад Уласай толгойлогшо хэлэбэ.
