Улаан-Үдэ хотодо Буряад Уласта хүгжөөгдэһэн «Эхэ орон хаанаһаа эхилнэб» гэһэн зүйдөөлгүй патриотическа хүмүүжүүлгын түсэлые Алас Дурнын федеральна тойрогой можо нютагуудта тарааха тухай хэлсэбэ.
Ородой Холбоото Уласай Юрэнхылэгшын Алас Дурнын федеральна тойрогто бүрин эрхэтэ түлөөлэгшэ Юрий Трутнев болон Буряад Уласай толгойлогшо Алексей Цыденовэй зүгһөө «Эхэ орон хаанаһаа эхилнэб» гэһэн түсэл бэелүүлэгдэнэ. Түсэлэй зорилго хадаа ажабайдалай элдэб һалбаринуудта: болбосоролдо, соёлдо, спортдо, аяншалгада, гэр бүлэдэ гэхэ мэтэ нэгэ янзын патриотическа үнэтэ зүйлнүүдые нэбтэрүүлхэ замаар улас дотор патриотическа хүмүүжүүлгын бүхэли системэ байгуулха болоно.
Ородой Холбоото Уласай Юрэнхылэгшэ Владимир Путин 2024 ондо «2030 он болотор хугасаада болон ерээдүйдэ 2036 он болотор Ородой Холбоото Уласай хүгжэлтын үндэһэтэнэй зорилгонууд тухай» гэһэн тогтоолоор 2030 он болотор Ородой соёлой болон оюун сэдьхэлэй заншалнууд дээрэ үндэһэлжэ, хүгжэнги патриотическа хүниие хүмүүжүүлхэ эрхэ нүхэсэл зохёохо тухай даабари үгэбэ.
- «Зүйдөөлгүй патриотическа хүмүүжүүлгэ» гээшэ бага наһанай үхибүүдэй, һургуулиин һурагшадай, оюутадай, ехэшүүлэй, булта хамтадаа хүн түрэлтэнэй, гүрэнэй үндэһэн үнэтэ зүйлнүүдые адли тэгшэ ойлгожо абаха гурим байгуулга болоно. Тиигээд бүхы харилсаан, ажабайдалай бүхы байгуулга иимэ аргаар бии болодог, бидэ адли бодолтойбди, зорилгонууднай адли. Юрэнхыдөө, энэмнай бултадаа хамта ажаһуудаг иимэ оршон байгуулжа, маанадые хүн болгожо бүрилдүүлнэ, патриотууд болгожо хүмүүжүүлнэ, ганса өөрынгөө түлөө бэшэ, харин үйлэ хэрэгүүдээрээ, ажал хэрэгээрээ тойроод байһан бүхы юумые: нютагаа, уласаа, бүхы гүрэнөө бэхижүүлнэ, - гэжэ Буряад Уласай толгойлогшо Алексей Цыденов онсолон тэмдэглэбэ.
Семинарта түсэлэй эмхидхэлэй байгуулга, социологическа шэнжэлэлгэ ба аудит, түсэлэй гол хэрэгсэлнүүд, гол түсэлнүүд, түсэлэй офисой ажал гэхэ мэтэ танилсуулагдаһан байна.
