Унаа тээбэридэ хэрэгтэй эрэмдэг бэетэй үхибүүдэй түрэлхид Буряад Уласта транспортын татабариһаа сүлөөлэгдэбэ. Ноябриин 18-да, понедельниктэ, Арадай Хуралай сесси дээрэ, 200 мориной моторой хүсэн шадалтай нэгэ хүнгэн автомашинын түлөө транспортын татабари түлэхэһөө тусбүлэгэй эрхэтэд сүлөөлэгдэһэн тухай хуули абтаба.
- Энэмнай региональна татабари болоно. Мүн Ородой Холбоото Уласай Налогой кодексой ёһоор, тээбэриин татабари тогтооходоо, Ородой Холбоото Уласай можо нютагуудай хуулинуудта татабариин хүнгэлэлтэнүүд, тэдэнэй хэрэглэлгын үндэһэн ба гурим хараалагдажа болохо. Бюджедэй талаар орёо байбашье, энэ социальна шэглэлдэ иимэ тэдхэмжэ үзүүлхэ шухала гэжэ тоолообди», - гэжэ Арадай Хуралай Бюджедэй, татабариин болон мүнгэн һангай талаар хорооной түрүүлэгшын орлогшо Михаил Степанов тайлбарилба.
2025 онһоо эхилжэ, гэр бүлэнүүд 2024 оной хугасаада татабариһаа сүлөөлэгдэхэ аргатай болохо. Транспортын хэрэгсэлдэ хэрэгтэй болохо эмнэлгын заалтанууд:
- хүл нюрга муутай байлга (зогсохо, ябахада хүндэ болодог нюрганай үбшэнүүд ба гажуудалнууд;
- яһанай болон үе мүсын үбшэнүүд, хүл, ула, үбдэгэй гэмтэл);
- зүрхэ-һудаһанай болон амисхалай системын үбшэн.
Бүхыдөө Буряад Уласта 70-аад иимэ үхибүүд тус хуулиин мэдэлдэ хамаарагдана.
