Буряад Уласта аяншалгын һалбариие гүрэнэй талаһаа дэмжэлгын хэмжээнүүд эдэй засагай хүгжэлтын сайд Максим Решетниковэй манай нютагта айлшалха үедэ зүбшэн хэлсэгдээ. Решетниковэй хэлэһэнэй ёһоор, нютаг можодо аяншалга хүгжөөхэ талаар гүрэнэй үндэһэн түсэлэй, Минэкономразвитиягай, Туризм.РФ корпорациин, бүтээн байгуулатын бюджедэй зээлиин шугамаар федеральна дэмжэлгын бүхы арга хэмжээнүүд зүбөөр хэрэглэгдэжэ байна.
- Эдэ бүгэдэ “Байгалай гавань” гэһэн эдэй засагай тусхай бүһэлүүрэй хүреэн соо дэлхэйн хэмжээнэй курорт ын бии болохо боломжо нээнэ, - гэжэ Решетников тэмдэглээ.
Буряад Улас болбол “Аяншалга болон хүлеэн абалтын индустри” гэһэн гүрэнэй үндэһэн түсэлэй дэмжэлгын арга хэмжээнүүдтэ эехэ эдэбхитэй оролсожо байна гэжэ уласай толгойлогшо Алексей Цыденов тэмдэглээ. Нёдондо жэл нютаг можо ехэ хүрэнгын бэшэ модульно зошод буудалнуудые бии болголгодо 300 сая түхэриг абаһан байха юм. Энэ жэлдэ федеральна бюджедһөө Буряад Уласта 590 сая түхэриг модульно кемпингэнүүдые, барилгада, пляжай бүтээн байгуулалта хүгжөөлгэдэ, аяншалгын маршрудуудые, тэдэнэй навигаци хэлгэдэ, амаралтын газарнуудые зохёон байгуулгада Улаан-Үдэ хотын аяншалгын түб болбосон тхэлтэй болголгодо, мүн баһа “Наадан-Сурхарбаан” гэһэн спортивно-соёлой наада зохёон байгуулгада һомологдоо.
