Доржо Банзаровай нэрэмжэтэ Буряадай гүрэнэй ехэ һургуулиин Буряад хэлэ сахин хүгжөөлгын түбэй ахалагша онол аргашан Ринчин Дылыкова Восток-Телеинформгэһэн мэдээсэлэй агентствын сурбалжалагшада 1-дэхи лицей-интернадта эрдэмэй хүтэлбэрилэгшөөр хүдэлһэн дүй дүршэл тухайгаа хөөрөө. Тэрэнэй хэлэһээр, Буряад Уласай үндэһэтэнэй 1-дэхи лицей-интернат хадаа хүүгэдые һурган хүмүүжүүлгын хоморой шухаг талмай юм. Тэндэхи багшанар ба хүмүүжүүлэгшэд арадайнгаа ерээдүйн түрүүшүүлые, ударидагшадые хүмүүжүүлхэ зорилго табидаг. Тиин тэдэ энэ харюусалга ехэтэй үүргэеэ амжалтатайгаар дүүргэдэг. Буряад хэлэеэ һайншье, муушье мэдэхэ хүүгэд һурахаяа ерэдэг гэжэ мэдээжэ.Тиибэшье лицей-интернадта үхибүүн бүхэнэй мэдэсэ шадабарида тааруулан, буряад хэлэ заадаг гуримтай байхаһаа гадна түрэл хэлэнэй оршондо хүмүүжүүлдэг заншалтай юм.
- Бүхы хүмүүжүүлэгшэд һурагшадтай буряадаар харилсадаг. Түрэлхид хүүгэдээ түрэл хэлэндэнь һургаха хүсэлтэй хадаа энээндэ ехэ урмашадаг. Үхибүүд хэшээлнүүдһээ гадна нэмэлтэ болбосоролдо хабаадуулагдадаг: тамирай секцинүүд, хүгжэмэй, хатарай, зурагай, зохёохы бэлигэй студинуудбии. Тиин булта угсаата соёлой шэглэлтэй холбоотой юм, - гэжэ Ринчин Сандановна тэмдэглээ.
Багшанар һурагшадай буряад хэлэнэй мэдэсын хэмжээнһээ уламжалан, һургаха ажалаа, һуралсалай-онол аргын согсолборинуудые тааруулдаг, шэрээн ба интерактивна наадануудые зохёон хэрэглэдэг, түр зуурын һуралсал эмхидхэдэг. Ганса хэшээлэй аргаар амжалта туйлахын аргагүй гэжэ ойлгодог һэн хойноо ходо шэнэ юумэ һанаашалжа, зохёожо байдаг. Мүн түрэлхидые һуралсалай үйлэ ябасада хабаадуулхаяа оролдодог. Холын хараада энэнь тон зүб гээшэ. Иимэ ажалай дүн гэхэдэ, энэ һургуулида буряад хэлэн эдэбхитэйгээр хэрэглэгдэдэг, һурагшадынь хаанашье амжалтатай байдаг, түрэл хэлэеэ, арадайнгаа ёһо заншал, соёл һайн мэдэдэг.Тэрэнэйнгээ ашаар олон соёлто ниигэмдэ урагшатай ябадаг.
Мүнөө лицей-интернадай хүмүүжүүлгын дүй дүршэл дэлгэржэ байна. Интернадай түхэлэй һургуулинуудай эблэл байгуулагданхай. Бүридэлдэнь түрэлхи буряад хэлэ заадаг һургуулинууд ородог: Улаан-Үдэ хотын 29-дэхи гимнази, Ивалгын аймагай Поселиин, Ахын аймагай Өөрлигэй һургуулинууд.
