Буряад Уласай гүрэнэй хоёр хэлэн дээрэ – ородоор болон буряадаар Улаан-Үдын дэлгүүрнүүдтэ юумэнэй үнэ бэшэгдэжэ эхилхээр болоо. Тээбэриин, дэлгүүр хэрэглэгшэдэй болон олзын хэрэг эрхилэгшэдэй талаар хорооной түрүүлэгшэ Юрий Ткачевай хэлэһэнэй ёһоор, мүнөө гол ехэнхи бараагай нэрэнүүдые хоёр хэлээр бэшээтэй карточкануудые хэхэ асуудалаар томохон худалдаанай сүлжээнүүдтэй ажал ябуулагдаахаар түсэблэгдэнэ.
- Энэнь болбол карточкануудаар үгэнүүдые мэдэжэ абаха заршамаар гэр ажахын бараануудай нэрэнүүдые сээжэлдэжэ абахада туһа болохо, - гэжэ тэрэ тоолоно.
Тэрэшэлэн Архитектурын болон хото барилгын талаар хороон гудамжануудай хаягуудые гүрэнэй хоёр хэлээр бэшээтэйгээр шэнэлхэ тухай асуудал хаража үзэжэ байнахай гэжэ тэмдэглэхэ хэрэгтэй. Гэхэтэй хамта, Хотын ажахын хороон энэ жэлдэ болбосон түхэлтэй болгогдожо байһан аяншалгын маршрудай зононуудта байһан сквернүүдэй нэрэнүүдые буряад хэлэн дээрэ оршуулха дурадхал оруулаа.
- Мүнөө албан зургаануудай хоорондо - коммунальна албанһаа ниигэмэй халамжын һалбари хүрэтэр хэлсэхэ ажал ябуулагдана. Бидэ заншалаа хамгаалха, түрэлхи хэлээ үндэһэтэнэй уласта хүгжөөхэ ёһотой болонобди, юундэб гэхэдэ, үндэһэн арад буряад хэлээрээ ярилдаха ёһотой юм. Мүнөө бидэ һэргээхэ ба дэмжэхэ зорилгонуудые урдаа табинабди. Энэ хоёр үгэнүүд болбол – һэргээлгэ болон дэмжэлгэ – ходо байха ёһотой бшуу. Бидэ энэ хэрэгтэ яһала анхаралтай хандаха ёһотойбди, - гэжэ мэрэй орлогшо Светлана Трифонова тобшолол хээ.
Буряад Уласта буряад хэлэ хамгаалга болон хүгжөөлгэ уласай болбосоролой болон эрдэм ухаанай яаманай бэлдэһэн хүтэлбэриин хүреэндэ ябуулагдадаг. Хүтэлбэри гүйсэдхэгшэдэй нэгэниинь болбол МОиН-ой байгуулһан Буряад хэлэ хүгжөөхэ уласай түб болодог юм гэжэ Восток-Телеинформ мэдээсэнэ.
