«Хүн зониие ниигэмэй талаар дэмжэлгын түб» гэһэн улас түрын гүрэнэй эмхи зургаанай Хориин аймагтахи таһаг буряад хэлэ хүгжөөлгын талаар уласай Толгойлогшо Алексей Цыденовэй 100 мянган түхэригэй шан абаа гэжэ Восток-Телеинформ бэшэнэ.
- Хориин таһагай мэргэжэлтэн Соелма Цыреновна Жигмитдоржиева мүрысөөндэ хабаадаха мэдүүлгэ оруулаа юм, - гэжэ Буряад Уласай Хүн зониие ниигэмэй талаар хамгаалгын яаманда мэдээсээ.
Буряад хэлэ сахин хүгжөөхэ түсэлэй хэмжээндэ Анаагай дасанай шэрээтэ Лэгсэг ламын дурадхалаар Хориин 1-дэхи дунда һургуулиин 1-дэхи «а» ангиин үхибүүдые харгалзалха шиидхэбэри абтаһан байна.
Тиин энэ ангиин һурагшадай олон хүүгэдтэй ба зөөри багатай түрэлхидтэ гүрэнэй ниигэмэй дэмжэлгэ абалгада туһалха, һурагшадта буряад хэлэ дэлгэрүүлхэ хэмжээ ябуулгануудые үнгэргэлгэдэ хамһалсаха юм. Толгойлогшын шангай мүнгэнэй ашаар Шэнэ жэлэй урдахана таһагай мэргэжэлтэд Сагаан Үбгэнтэй хамта багашуулда буряад онтохонуудые, оньһон үгэнүүдые шагнахаяа бэлэгтэйгээр айлшалха.
Тиихэдэ хүүгэдые Буряад театр абаашахаар хараалагдана. Д.З. Жалсараевай нэрэмжэтэ Хориин номой сантай суг багашуулда буряад хэлэн дээрэ һайндэр эмхидхэгдэхэ. Гадна энэ таһагай гаршагтай самбарнууд, хабтаһанууд буряад хэлэн дээрэ бүтээгдэнхэй.
Буряад хэлэн «2021 - 2030 онуудта буряад хэлэ сахин хүгжөөлгэ» гэһэн улас түрын программын хэмжээндэ дэмжэгдэдэг гэжэ тэмдэглэхэ шухала. Программые Буряад Уласай Болбосоролой болон эрдэм ухаанай яаман залан хүтэлдэг, харин бэелүүлэгшэдэйнь нэгэн - яаманай Буряад хэлэ хүгжөөхэ талаар улас түрын түб.
