Улаан-Үдэ хотодо «Ая-ганга» гэһэн хүүгэдэй 52-дохи сэсэрлигтэ үхибүүд буряад хэлэ рободтой үзэжэ эхилээ. Буряадаар дуугардаг рободые уласай Болбосоролой болон эрдэм ухаанай яаман «Эрхим хүмүүжүүлэгшэ» гэһэн мүрысөөнэй хэмжээндэ сэсэрлигтэ бэлэглээ юм. Ахалагша хүмүүжүүлэгшэ, мүрысөөнэй илагша Дарима Дашиевагай Восток-Телеинформ мэдээсэлэй агентствын сурбалжалагшада хэлэһээр, робот багашуултай харилсажа, дуулажа, хатаржа үрдеэ.
- Үхибүүд буряадаар дуугардаг рободые ямар нэгэн шэди шэнгеэр һанадаг. Тэрэниие хүгжэмэй хэшээлдэ хэрэглэнэбди. Шадабаринуудтань нэмэри болгон, буряадаар хэдэн асуудал диктофон дээрэ бэшээд, үхибүүд ба рободой хоорондо хөөрэлдөө эмхидхэдэгбди. Тиин хүүгэд буряад хэлэ ехэ һонирхон үзэнэ, - гэжэ Дарима Дашиева тэмдэглээ.
Үхибүүдэй түргөөр һонёо буурашахагүйн тула рободые үдэр бүхэндэ хэрэглэдэггүй байна. Тэрэ сэсэрлигтэ арбан үдэр айлшалаад, Шэнэ жэл болотор гэртээ ниидэжэ ошонхой.
Үхибүүд рободые хүлеэжэ ядашанхай. Тэрээндэ бэлэгүүдые бэлдэхэ, бэшэг бэшэхэ. Хэшээлнүүднай иимэрхүү түхэлөөр үргэлжэлхэ. Хүүгэдэй сэсэрлиг гээшэмнай үльгэрэй орон ха юм. Тиимэһээ ходо шэнэ юумэ зохёожо, багашуулые һонирхуулжа, буряад хэлэндэ һургаха шухала, - гэжэ эрхим хүмүүжүүлэгшэ онсолоо.
Буряад хэлэн «2021 - 2030 онуудта буряад хэлэ сахин хүгжөөлгэ» гэһэн улас түрын программын хэмжээндэ дэмжэгдэдэг гэжэ тэмдэглэхэ шухала. Программые Буряад Уласай Болбосоролой болон эрдэм ухаанай яаман залан хүтэлдэг, харин бэелүүлэгшэдэйнь нэгэн - яаманай Буряад хэлэ хүгжөөхэ талаар улас түрын түб.
