Буряад Уластахи эгээл урданай эмхинүүдэй нэгэн болохо «Буряадай һүн» хамтарал 60 жэлэйнгээ ой угтажа байнхай. Ойн баярай ёһолол Оперо-баледай театр соо арба һарын 22-то үнгэрбэ. Тэндэ Арадай Хуралай вице-спикер Владимир Павлов хабаадажа, һунгамалнуудай нэрэһээ эмхиие хүтэлэгшэ Юрий Тармаевые болоод бүхы ажалшадыень амаршалһан байна.
«Улаан-Үдын механик аргаар һү-тоһо буйлуулгын Буряад-Монголой АССР-эй завод» ашаглалгада тушааха тухай зарлигта 1955 оной октябрь һарада гар табигдаа һэн, - гээд һануулая. 1993 ондо энэ эмхи акци баригшадай хамтарал болоо. Харин хэдыхэн жэлэй урда һүнэй завод һэльбэн шэнэлэгдэжэ, цехууд соонь хари гүрэнэй мүнөөнэй түхеэрэлгэнүүд тодхогдоо һэн. Мүнөө сагта «Буряадай һүн» хамтарал Улас түрын эгээл эрхимүүдэй тоодо оролсодог болонхой.
