Арадай Хуралда бэлэдхэл ябуулагдана. Буряад Уласай прокуророй уголовно яла гүйсэдхэлгын талаар хуули сахихые хинаха талаар туһалагша Олег Фалилеев «Буряад Уласта социальна шэглэлтэй олзын хэрэг эрхилэлгын бэшэ эмхинүүдтэ гүрэнэй тэдхэмжэ тухай Буряад Уласай хуулиин 4-дэхи статьяда хубилалтануудые оруулха тухай» гэһэн хуулиин түсэл тухай һунгамалнуудта мэдээсэбэ.
Тиихэдэ Арадай Хуралай Зүблэлдэ Ниигэмэй бодолгын хорооной һунгагдаһан түлөөлэгшэ Игорь Зубаревай кандидатура депутадууд хаража үзэбэ. Гүрэнэй байгууламжын хорооной түрүүлэгшэ Петр Мордовскиин дурадхаһан хэдэн хуулиин түсэлнүүд һунгамалнуудые һунгаха тухай, гэмтэ ябадалһаа һэргылэмжын, ажалаар хангалгын һалбарида эрхэ мэдэл хизаарлалгын, нютагай өөһэдын хүтэлбэриин түлөөлэгшэдэй зургаануудай зүблэлэй бүридэл тухай хуулинуудта хубилалтануудые оруулха тухай байгаа.
Арадай Хуралай гэшүүд мүн лэ түлбэригүй эрхэ зүйн туһаламжа үзүүлхэ тухай региональна хуулида хубилалтануудые хаража үзэбэ. Депутат Михаил Гергенов суг хүдэлдэг нүхэдтөө «Буряад Уласта кинематографида гүрэнэй тэдхэмжэ тухай» гэһэн республикын хуулида оруулагдаха хубилалтанууд тухай хөөрэбэ. 2026 оной апрелиин 25-най №106-ФЗ гэһэн федеральна хуулиин шэнэ эрилтэнүүдэй ёһоор, үндэһэтэнэй фильмнүүдые буулгаха талаар гүрэнэй хахад мүнгэн мүнөө Ородой Соёлой яаманай баталһан түрүү шэглэлэй сэдэбүүдтэ таараһан кинонуудаар хизаарлагдаха.
Саашадаа «Буряад Уласай «Бэеын тамирай болон тамир тухай» хуулида хубилалтануудые оруулха тухай» гэһэн хуулиин түсэл хараалагдаа. Заһабаринууд холбоото гүйсэдхэхы засагай хүтэлбэрилэгшые томилхо ба болюулха гуримда нүлөөлхэ, энэнь федеральна хуули ёһоной хубилалтануудһаа мүн лэ тодорхойлогдоно.
