Арадай Хуралай Аграрна хорооной түрүүлэгшэ Семён Матхеев уласай хүдөө ажахын болон эдеэ хоолой яаманай ажалай нүүдэл зүблөөндэ хабаадаба. Энэ хуралдаанда хүдөө ажахын селекциин болон үрэһэ таяранай асуудалнууд хэлсэгдээ.
Тус хэмжээ ябуулга Ивалгын аймагта Буряадай хүдөө ажахын эрдэмэй хүреэлэндэ үнгэргэгдөө. Эндэ үсхэбэрилэгдэдэг таряанай сортонуудые Омскһоо эхилээд, Монгол хүрэтэр ургуулдаг байгаа. Мүнөөдэр тус институдта техническэ баазаяа шэнэлхэ, хадагалха талмай дуталдаха, хуушарһан техникэ һэлгэхэ асуудалнуудые шиидхэхэ хэрэгтэй гэжэ Арадай Хуралай хэблэлэй албан мэдээсэнэ.
Мүн тиихэдэ Буряадай хүдөө ажахын эрдэм шэнжэлгын институдта залуу кадрнууд хэрэгтэй. Ешмээнэй «Одон», «Наран» сортонуудые гаргагша болохо Валентина Парфёнова дүй дүршэл ехэтэй селекционернүүдтэй үрэһэ үйлэдбэрилгын ерээдүй тухай хэлсэхэдээ, энээн тухай хэлсэгдэһэн байна. Буряадай сортонууд ондоо нютагуудта үсхэбэрилэгдэһэн сортонуудта орходоо, ган гасуурта үлүү тэсэбэритэй байдаг. Мэргэжэлтэдэй, илангаяа Намжил Мардваевай тэмдэглэһээр, нютагай шэлэн абалгын сортонуудые хэрэглэжэ, мүнөө байһан шэнги гантай жэлдэшье ургаса абаха аргатай. Буряад орондо селекциин ажал һэргээгдэжэ байна. Мүнөөдэр гүрэнэй шэлэн абалгын туйлалтануудай бүридхэлдэ таряанай 15 сорто оронхой. Уридшалһан үрэжүүлгын питомник соо үшөө хоёр шэнэ сорт – хабарай ешмээнэй «Нүхэр», хабарай обёос «Тамир» эндэ уригдаһан хүдөө ажахынхидые ехэтэ һонирхуулаа.
