Улаан-Үдэ хотын Илалтын хүшөөдэ «Илалтын дүлэн» ёһололой бадаралга болобо. Японой Квантунай бүлэгые бута сохиһондо, Дэлхэйн хоёрдохи дайнай дүүрэлгэдэ зорюулагдаһан уласхоорондын түсэлдэ хабаадагшад, тэрэ тоодо Арадай Хуралай гүрэнэй байгууламжын талаар хорооной түрүүлэгшэ Петр Мордовской, тэрэнэй орлогшо Жамбал-Жамсо Жанаев гэгшэд ороно. Тэдэнэр маршал Рокоссовскийн хүшөөдэ ба Мүнхэ галда сэсэгүүдые үргөө.
Тэбхэр 80 жэлэй саана, 1945 оной августын 9-дэ, СССР ба милитарис Япон хоёрой хоорондо дайн эхилээ һэн. Тэрэ дайн түргэн болобо. Зуугаад мянган совет сэрэгшэд, хэдэн арбаад мянган сэрэгэй техникэ Баруун тээһээ Зүүн зүг руу нюусаар дамжуулагдаа. Тиигээд нэгэ сая шахуу хүнтэй Квантун сэрэг диилдэбэ. Энэнь Урда Сахалин болон Курилын аралнуудые манай гүрэндэ бусааха арга боломжые бии болгожо, Алас Дурна зүгэй болон бүхы Ази-Номгон далайн хизаарай түүхэдэ, мүн Дэлхэйн хоёрдохи дайнай түгэсхэлдэ тодорхойлогшо шалтагаан болоһон юм.
Августын 9 мүн лэ 1944 оной Ленинградай байлдаанай түгэсхэлэй үдэр болоно.Тиимэһээ мүнөөдэр Ород гүрэндэ дайшалхы алдар солын үдэр тэмдэглэгдэнэ. Санкт-Петербург болон Ленинградай можодо мүн лэ Илалтын дүлэнэй галнууд бадараагдажа, Японой булимтарагшадые диилэхэ хэрэгтэ хамтын хубитые тэмдэглэһэн байна.
