Буряад Уласай Толгойлогшо Алексей Цыденов уласай засагай газарай ажал ябуулга тухай элидхэл хэхэдээ, СВО-до хабаадагшад болон тэдэнэй гэр бүлэнүүдтэ дэмжэлгын хэмжээ ябуулганууд тухай хэлээ. Буряад Уласта СВО-до хабаадагшад болон тэдэнэй гэр бүлэнүүдтэ дэмжэлгын 50-аад хэмжээ ябуулганууд бэелүүлэгдэнэ. Тэдэнэй түлөө “122” болон “117” гэһэн шууд утаһанууд хүдэлнэ.
Тиихэдэ “СВО-до хабаадагшадта болон тэдэнэй гэр бүлэнүүдтэ туһаламжа” гэһэн чат-бот бии.
СВО-гой ветеранууд ажал олоходонь, ажалайнгаа намтар хүгжөөлгэдэ түрүүлэн туһаламжа абадаг. Тиигэжэ 2024 ондо сэрэгэй тусхай операцида хабаадаһан гурбан мэдүүлгэ бариһан хүнүүд «Агростартап» гэһэн грантын мүрысөөндэ илагшад болоһон байна. 2025 ондо тэдэ 18- болоо гэжэ һануулая.
Тусхай сэрэгэй операцида хабаадагшад уласай гүрэнэй эмнэлгын эмхинүүдтэ эмнэлгэ абана, соёлой эмхи зургаанууд болон тамирай секцинүүдээр түлбэригүйгөөр ябаха эрхэтэй, энэнь мүрысөөнүүдтэ эдэбхитэйгээр хабаадаха арга олгоно. Тиихэдэ үншэн үхибүүдэй дундаһаа СВО-до хабаадагшад гэр байрынгаа байдал һайжаруулхын түлөө түрүүлэн үнэмшэлгэ абана. Тусхай сэрэгэй операцида хабаадагшадта болон тэдэнэй
гэртэхиндэ социальна тэдхэмжэ үзүүлхэ талаар ехэ ажал ябуулагдаа. Хэлсээ баталһан, сэрэгэй тусхай операцида мордожо байһан бүхы эрхэтэд региональна нэгэ удаагай түлбэри абана. 2025 оной майн 1-һээ тэрэнэй хэмжээн 1 сая түхэриг болоно.
2024 ондо дэмжэлгын шэнэ хэмжээн нэбтэрүүлэгдээ – тусхай операциин үедэ дайнда үгы болоһон хүнүүдэй гэр бүлэнүүдтэ гэр байрын болон коммунальна хангалгын түлөө һарын түлбэри.
- Энэмнай тусхай дэмжэлгын хэмжээн болоно, хүнэй баряанда абтабал, тэрээндэ дайшалхы тэдхэмжэ олгогдодоггүй, гэр бүлэ мүнгэн һангай хүндэ байдалда ородог гэжэ ойлгонобди, гэр байрын-коммунальна хангалгын түлбэри түлэхэ талаар дэмжэлгэ үзүүлнэбди, - гэжэ Цыденов тэмдэглэбэ.
