Буряад Уласай Толгойлогшо Алексей Цыденов болон Буряад Уласай Арадай Хуралай Түрүүлэгшэ Владимир Павлов гэгшэд гүрэнэй үндэр шагналнуудта – Суворовой болон Жуковай орденуудта хүртэһэн 11-дэхи тусхай гвардиин агаарай-десантна штурмовой бригада амаршалба.
1968 ондо байгуулагдаһан 11-дэхи бригада 1992 онһоо Буряад Уласта байрлана, тусхай сэрэгэй операциин түрүүшын үдэрһөө Буряадай бригадын сэрэгшэд гүрэнэй үндэһэтэн һонирхол хамгаална.
- Сэрэгэй тусхай операциин эхилһэн сагhаа гвардейскэ агаарай-десантна штурмовой бригадын байлдагшад дайшалхы контактна шугам дээрэ түрүүшын ээлжээндэ ябажа, дайшалхы даабаринуудые хүндэтэйгөөр дүүргэдэг. Байлдаанда харуулһан 11-дэхи бригадын баатаршалга Ородой Холбоото Уласай Юрэнхылэгшэ Владимир Владимирович Путин үндэрөөр сэгнэһэн байна. Гүрэнэй Толгойлогшын зарлигаар сэрэгэй тусхай операциин үедэ сэрэгшэдэй харуулһан эрэлхэг зориг, бэеэ зорюулһанайнгаа түлөө бригада гүрэнэй шагналнуудаар – Суворовой болон Жуковай орденуудаар шагнагдаа. Буряад Уласай Арадай Хуралай һунгамалнуудай зүгһөө бригадын бүхы сэрэгшэдые ёһотойл үндэр шагналаарнь амаршалнаб! Эрэлхэг зориг ба баатаршалга гаргаһандатнай, эрэлхэг зоригойтнай түлөө баярые хүргэнэбди! Уялгаяа дүүргэжэ унаһан сэрэгшэдтэ мүнхэ дурасхаал. Саашадаа гүрэнэйнгөө үндэһэтэнэй һонирхолнуудые бата бэхеэр харууһалжа, Ородой Холбоото Уласай Зэбсэгтэ хүсэнүүдэй дайшалхы хүсые бэхижүүлгэдэ горитойхон хубитаяа оруулхат гэжэ этигэнэбди. Элүүр энхые, бүхы һайниие хүсэнэб! Хажуудань үнэн сэхэ, найдамтай нүхэд, дайшалхы нүхэд хододоо байхань болтогой! - гэжэ Арадай Хуралай Түрүүлэгшэ Владимир Павлов хэлэбэ.
