Буряад Уласай Толгойлогшо Алексей Цыденов “Муравьев-Амурский 2030: карьера в Арктике и Дальнем Востоке – выбор сильных” гэһэн сессидэ хабаадаба. Мурманск хотодо үнгэрһэн Уласхоорондын Арктикын хуралдаанай хэмжээндэ болоо.
- Гүрэнэй албан болбол юрын ажал бэшэ, харин алба хаалга мүн. Эндэ бидэндэ доторой эршэ хүсэтэй, эрмэлзэлтэй, үйлэ ябасые урагшань ябуулха хүсэлтэй хүнүүд хэрэгтэй. Тиимэһээ һургуули дүүргэгшэд нютаг нютагтаа һуурияа олохонь шухала. Нютагтаа үндыһэн зон тэрэнэй онсо шэнжые һайнаар ойлгожо, нютагайнгаа ажабайдалай шанар дээшэлүүлхэ арга боломжоёо үрэ дүнтэйгөөр бэелүүлхэ аргатай болохо гэжэ Алексей Цыденов тэмдэглэбэ.
Буряадай залуу мэргэжэлтэд «Муравьев-Амурский 2030» гэһэн программада эдэбхитэйгээр хабаадана. Һүүлэй гурбан жэлэй туршада можын долоон ажаһуугшад һуралсал гаража, олон һалбаринуудта, тэрэ тоодо хүтэлбэриин үүргэ дүүргэхэдээ, өөрыгөө гэршэлһэн байна.
Тодорхойгоор хэлэбэл, “Эсэгэ ороноо хамгаалагшад” гэһэн гүрэнэй жасын Буряадай таһагые даагшаар түрүүшын программа дүүргэһэн Илья Михалев томилогдоо. Хоёрдохи ээлжээ дүүргэһэн Тимур Гомбоев уласай хүдөө ажахын болон эдеэ хоолой сайдай орлогшо болоо. Мүнөө сагта практикаяа гараһан гурбадахи программын курсантнуудай дундаһаа шэнэ мэргэжэлтэдэй ерэхэнь хүлеэгдэнэ.
