Буряадай толгойлогшо Алексей Цыденов уласай ажаһуугшадые Эсэгын һайндэрөөр амаршалба. 2018 ондо Буряад орондо, 2021 онһоо бүхы Ород гүрэн дотор Эсэгын һайндэр тэмдэглэгдэнэ, энэнь энэ үүргын шухала байһые онсолно. Үхибүүе эхэ эсэгын хоюулаа хүмүүжүүлхэдэ, бүхы талаараа, эбтэй эетэй зан абари бүрилдэнэ гэжэ Цыденов тэмдэглэбэ.
“Эсэгэ бүхэн хадаа хамгаалалга, найдамтай тулгуури, жэшээ болоно. Тиимэһээ эсэгэнэрэй өөһэдөө зохистой байхань шухала. Гэр бүлэеэ гамнажа, заншалта гэр бүлынгөө үнэтэ зүйлнүүдые сахижа ябаһан эрэ хүн бүхэндэ гүнзэгы баяраа мэдүүлнэб. Жэнхэни баатарнуудые хүмүүжүүлһэн эсэгэнэртэ, Эхэ ороноо хамгаалдаг патриотуудта онсо баярые хүргэнэб. Үхибүүн бүхэн абатай байг гэжэ хүсэнэб», - гэжэ Буряадай толгойлогшо амаршалба.
Ород гүрэнэй болон Буряадай Засагай газарнууд гэр бүлэнүүдые эдэбхитэйгээр дэмжэнэ гэжэ Цыденов нэмэбэ. Улас дотор үхибүүдтэ жэлэй түлбэри 23 миллиардһаа дээшэ болоно. Нютаг бүхэндэ харюусалгатай эсэгэ болохые дэмжэхэ зорилготойгоор эсэгэнэрэй зүблэлнүүд байгуулагдаа, эсэгэнэр болон үхибүүдэй хабаадалгатай хамтын хэмжээ ябуулганууд эхэ эсэгын үүргэ хүмүүжүүлгэдэ бэхижүүлнэ.
Буряад орондо Эсэгын һайндэртэ олон үхибүүдтэй СВО-до хабаадагшад шагнагдаа гэжэ һануулая. Уригдаһан айлшадай дунда сэрэгэй тусхай операцида хабаадагшад болон байлдаанай ветеранууд байгаа. СВО-до хабаадагша40 хүн уласай хүтэлбэрилэгшын Баяр баясхалангай бэшэгүүдтэ хүртөө гэжэ Буряад Уласай Ниигэмэй хамгаалгын яаман мэдээсэнэ. Тэдэнэй тоодо 17 хүн олон үхибүүдтэй эсэгэнэр, гэр бүлэдэнь гурба, дүрбэн, долоон, бүри найман үхибүүтэй юм.
