Буряад Уласай Ярууын аймагай Иисинга тосхондо Буряад ороной эрхим хирург Еши Нянюевич Цыбиковай фельдшерэй-акушерскэ пунктын байшанда дурасхаалай самбар нээгдэбэ. Арадай Хуралай һунгамалнууд Бадмадоржо Жигжитов, Анатолий Дымчиков, Татьяна Баженова, уласай эмшэдэй бүлэг, нүхэд болон оюутад, нютагаархид Еши Нянюевичта дурасхаалай самбарай нээлгын баяр ёһололдо хабаадаа.
Еши Цыбиков - уласай зүрхэ-һудаһанай хирургиин эхи табигша, хирургнуудай “Буряадай” һургуули байгуулагша, Буряадай АССР-эй ба РСФСР-эй габьяата эмшэн, анагааха ухаанай эрдэмэй доктор, арадай эмшэн ба уласай хүндэтэ эрхэтэн, улас түрын, олониитын ажал ябуулагша байгаа.
Уласай парламентын түрүүлэгшэ Владимир Павлов суута хирургые һайн мэдэдэг һэн. Тиигэжэ тэрэнэй, мүн Арадай Хуралай һунгамалнуудай аша туһаар түрэл нютагтань нютагаархидынь агуу эмшэнэй дурасхаалда дурасхаалай самбар тодхоһон байна.
“Еши Нянюевич – Буряад ороной, Яруунын суута хүбүүн. Тэрэ Иисинга тосхондо түрэжэ үндыһэн юм. Агууехэ эмшэн, олон зоной ами наһа абарһан бэлигтэй хирург байгаа. Тэрэ манай уластаолохон хирургнуудые бэлдэһэн, шабинарынь бүхы гүрэн дотороо, мүн Монгол ороноор ажаллана. Еши Нянюевич ганса хирурги хүгжөөлгэдэ бэшэ, харин бүхыдөө бүхы буряад эмнэлгэдэ сэгнэшэгүй ехэ хубитаяа оруулһан байна», - гэжэ Бадмадоржо Жигжитов тэмдэглэбэ.
