Владивосток хотодо һуугша Энэдхэг уласай юрэнхы консул ноён Сай Мурали Буряад орондо июниин 4-дэ ажаллаар айлшалан ерээ. Июниин 5-да юрэнхы консул Буряад Уласай Толгойлогшо Алексей Цыденовтэй уулзаа гэжэ Буряад Уласай Засагай газарай хэблэл мэдээсэлэй албан мэдээсэнэ.
- Энэдхэгтэй олон юумэмнай нэгэ, манай эндэ улас буддын шажантай, Энэдхэгһээ лама санаартан манда хүрэжэ ерээ һэн, манай хубарагууд Энэдхэгтэ һурадаг, юрэнхэ дээрэнь хэлэхэ болоо һаа, гүн ухаамнай дотоно. Ондоо шэглэлнүдээр: эдэй засагаар, аяншалгаар, элүүрые хамгаалгын талаар ажаллаха һанаан бии, - гээд Алексей Цыденов мэндэшэлээ.
Баталан хамгаалалтын промышленностиин талаар хамтаран ажаллахада анхарал хандуулаа, юундэб гэхэдэ, Улаан-Үдын авиационно завод Энэдхэг руу вертоледуудые эльгээдэг юм.
- К-226 вертоледой түсэл бии, тэрэ мүнөө түр зогсоод байна, зүгөөр энэ түсэл ерэдүйтэй, юундэб гэхэдэ, Энэдхэг эльгээгдэхэһээ гадна бүхы дэлхэйгээр абаашагдахаар хараалагдана. К-226 мүнөө дээрээ шэлдэг ветолет, тэрэ хада уулада, үндэр газарта тааруулагдаһан, тэрэнэй ажаллаха зооно болбол 6 мянган метр болотор. Дэлхэй дээрэ иимэ вертолетдууд үгы юм, - гэжэ Буряад Уласай Толгойлогшо тэмдэглээ.
АлексейЦыденов мүн лэ иигэжэ хэлээ, аяншалга болбол хамтаран ажаллахын тула ерээдүйн үшөө нэгэ шэглэл. Тэрэ тоодо, Байгал дээрэ зошод буудалнуудые барихаар бэлэн хүрэнгэтэниие болон аяншалагшадые хабаадуулха Буряад орон һонирхолтой.
