Буряад Уласай Арадай Хуралай түрүүлэгшэ Владимир Павлов мүнөөдэр уласай зуун жэлэй баяр тэмдэглэлгын хоёрдохи үдэртэ оролсоно. Мүнөөдэр Буряад Уласай хүндэтэй айлшадтай, Ород гүрэнэй нютаг можонуудай болон Монголой түлөөлэгшэдтэй хамта аймагуудай танилсуулгын харалганда оролсоо. Буряад Уласай бүхы аймагууд «Минии тоонто - моя малая родина» гэһэн урилдаан-харалганда оролсожо байнхай.
Баяр баясхаланай арга хэмжээнүүдтэ Буряад Уласай хүршэ нютаг можонуудай болон анда хотонуудай түлөөлэгшэд оролсоно гэжэ һануулая. Тиин, Улаан-Үдэдэ Тыва Уласай Юрэнхы Хуралай (парламентын) түрүүлэгшэ Кан-оол Даваа, Эрхүү можын Хуули гаргалгын Суглаанай түрүүлэгшын орлогшо Кузьма Алдаров, Үбэр Байгалай Хуули гаргалгын Суглаанай түрүүлэгшын орлогшо Цырен Цыренов болон бусад айлшаар буужа ерэнхэй байна.
Айлшад ехэ юртада айлшалаа, тэндэ “Уран дархан” гэһэн яармаг үзэсхэлэндэ арадай уран бүтээлэй дархашуулай шэлдэг ажалнууд дэлгээгдэнэ. Тиихэдэ Владимир Павлов уласай зуун жэл тэмдэглэхын хэмжээн соо Тыва уласай, Үбэр Байгалай хизаарай болон Эрхүү можын түлөөлэлэгшэдтэй уулзалга үнгэргөө.
Урид үдэрыень Владимир Павлов “Буряад ороной уран зурагай уралиг” гэһэн үзэсхэлэн ошожо үзөө. Арадай Хуралай Түрүүлэгшэ Владимир Павлов Буряад Уласай 100 жэлэй ойдо зорюулагдаһан “Буряад ороной уран зурагай уралиг” гэһэн үзэсхэлэнэй нээлтэдэ оролсоо. Энэ хэмжээ ябуулга июниин 2-то Сампиловай нэрэмжэтэ музейдэ болоо юм. Эндэ Буряад Уласай толгойлогшо, засагай түлөөлэгшэд, уран зураашад болон нютагай ажаһуугшад оролсоһон байна.
