Буряад Уласта гүрэнэй засагай зургаануудта болон нютагай өөһэдын хүтэлбэриин зургаануудта амитадта хандасын талаар зарим эрхэ түлөөлэлгэнүүд олгогдоо. “Амитадта хандасын талаар Буряад Уласай гүрэнэй засагай зургаануудай болон муниципальна байгууламжануудай нютагай өөһэдын хүтэлбэриин зургаануудай зарим эрхэ түлөөлэлгэнүүд тухай” уласай хуулида оруулха хубилалтануудые ноябриин 17-до ээлжээтэ сесси дээрэ Арадай Хуралай һунгамалнууд баталаа.
Тиигэжэ Буряад Уласай Засагай газар гэрэй амитадые харууһалха болон зайлгаха эрилтэнүүдые тогтоохо эрхэтэй болоо. Ветеринариин хэлтэс болбол эзэдгүйгөөр амитадай амидаралдань болон эрхэтэдэй элүүр мэндэдэ хоро хүргэнгүйгөөр хандаха гуримай түлөө харюусаха болоо. Харин уласай аймагуудта нютагай засагууд эзэгүй амитадые байһан газартань бусаажа болохогүй газарнуудые тодорхойлхо эрхэ түлөөлэлгэтэй болохо болоо.
- Гэрэй амитадые зайлгаха болон харууһалха хэрэгтэ нэмэлтэ эрилтэнүүдые үзүүлхэ талаар эрхэ түлөөлэлгэнүүдые Буряад Уласай засагай газарта даалгажа, манай хуулида хубилалтануудые оруулха дурадхал оруулнабди. Эзэгүй амитадта хоро хүргэнгүй байха талаар нэмэлтэ эрхэ түлөөлэлгэнүүд Ветеринариин хэлтэстэ олгогдоно, - гэжэ Газарай асуудалнуудай, хүдөө ажахын болон хэрэглэгшэдэй заха зээлиин талаар Арадай Хуралай хорооной түрүүлэгшэ Дмитрий Швецов мэдээсээ.
