Улаан-Үдын Комсомольская үйлсэдэ Александр Лубсанов 20 гаран жэлдэ ажаһууһан юм. Тэрэ гэрэй ханада Дурасхаалай самбар үлгэгдэбэ.
«Буряадай комсомолой ветеранууд» гэһэн эмхи түрүүлэн, иимэ дурадхал оруулһан байна. Хэрэгынь бэелүүлэгдэжэ, Александр Гомбоевтой олон жэлдэ суг хамта хүдэлһэн нүхэдынь, танил талануудынь болон түрэлхидынь баярай хэмжээ ябуулгада хабаадалсаа.
-Эхэ оронойнгоо эгээл хүндэ сагта Александр Лубсанов хүдэлхэ хуби заяатай байгаа. Аяар 30 гаран жэлдэ ЛВРЗ-дэ ажаллахадаа, айхабтар ехэ дүршэл халан абажа гараһан байна. Тэрэ дүршэлынь саашадаа хүтэлбэрилхы ажалда ябахадань, амаргүй ехэ туһа боложо үгэдэг байһаниинь гайхалгүй. Арадай Хуралай түрүүлэгшын тушаалда ябахадаа, хүн бүхэнтэй үгэеэ ойлголсоод, ажалаа жэншэдгүй ябуулдаг һэн, - гэжэ Арадай Хуралай Түрүүлэгшэ Владимир Павлов хэлэбэ.
Арадай Хуралай һунгамал болохоһоо урид Александр Гомбоевич Лубсанов Улаан-Үдын мэрэй тушаалда ажаллаһан намтартай. Хаанашье, ямаршье тушаал эзэлжэ хүдэлхэдөө, юрын ажаһуугшадай тала барин ажалладаг һэн гээд, самбар нээлгын үедэ һанамжануудаараа зон хубаалдаа. Тэрэ наһанайнгаа амаралтада гараад, миин гэртээ һуугаагүй, «Хүйхэр үбгэжөөлнүүд» гэһэн дуушадай бүлгэмэй гэшүүн боложо, һайхан хоолойгоороо харагшадаа баярлуулжа ябаа. Нүхэрэйнгөө дурасхаалта үдэртэ эдэ «үбгэд» ерэжэ, мүн лэ дуугаа хангюурдаһан байна.
