Энээн тухай асуудал Арадай Хуралай хорооной түрүүлэгшэ Виктор Малышенко бодхооһон байна.
-Үхэр малай таряалан түйбэхэгүйн түлөө ямаршье асуудал манай уласта шиидхэгдээгүй. Энэмнай хүдөө ажахын хүгжэлтэдэ нилээд ехэ һаад ушаруулна. Һаяхана Кабанскын аймагаар ажалай хэрэгээр ябажа ерэхэдээ, энэ шухала асуудалтай дүтөөр танилсаһан байнабди. Үмсэдөө 10 гаран толгой үхэрнүүдтэй айлнууд, тэдэнээ бэлшээхэ газараар дуталдана. Тиимэһээ хүнэй газар дээрэ үхэр малаа адуулха баатай болоно.
Хүдөө ажахын сайдай мэдээсэһээр тус асуудал нютагай сомоной, сагдаанарай шиидхэхэ асуудал болоно. Үнэн дээрээ иимэ ажал хэгдэнэгүй.
- Энэ талаар хуули хазагайруулһанай түлөө ажаһуугшад 5 мянган түхэригэй ялада унаха ёһотой. Буряад Уласай тусхай иимэ хуули бии юм. Таряаланай газарта бэлшэһэн үхэр, адуун болон хонидой толгой бүхэнэйнь түлөө эзэндэнь яла тохохо ёһотой. Теэд сагдаанарай зүгһөө ямаршье ажал хэгдэнэгүй, - гэжэ Хүдөө ажахын яаманай сайд Галсан Дареев сэхэ руунь хэлэбэ.
Тиимэһээ зайн гал татажа таряалангаа аршалха тухай дурадхабад. Хүдөө ажалшадай тус хэрэгсэл худалдан абахадань 50 хуби гаргашыень гүрэн бусааха болоно.
