Буряадай Арадай Хуралай «Единая Россия» фракциин һунгамалнуудай хуули гаргалгын зохихо үүсхэлээр медицинын хүдэлмэрилэгшэдые гэр байраар хангаха «100 гэр эмшэдтэ» гэһэн түсэл Буряад уласта хүдэлжэ эхилбэ. Энээн тухай хуули Буряадай Арадай Хуралай Түрүүлэгшын орлогшо, «Единая Россия» фракциин гэшүүн Татьяна Мантатова 14-дэхи сесси дээрэ дуулгаһан байна. Аймагуудта хүдэлдэг эмшэдые дэмжэхэ зорилготойгоор энэ түсэл бэелүүлэгдэнэ.
-Программа бэелүүлгэдэ уласай һанһаа мүнгэн һомологдоно. Буряадай Засагай газарта, бусад фракциин һунгамалнуудта манай энэ үүсхэл дэмжэһэндэнь, баяраа мэдүүлнэбди,- гэжэ Татьяна Мантатова хэлэнэ.
«Хүдөөгэй ипотекэ» гэһэн программаар Россельхозбанк хүнгэлэлтэтэй урьһаламжа эмшэдтэ үгэжэ эхилбэ. Хүдөө нютагта хүдэлдэг эмшэд гэр абаха аргатай болобо. Хориин аймагай түбэй эмнэлгын байшанай фельдшер Иван Ланцов түрүүшүүлэй дунда энэ программада хабаадажа, 1,7 млн түхэриг абаа. Энэ мүнгөөрөө аймагай түбтэ гэр абаад, мүнөө үедэ түбхинэжэ эхилбэ. Залуу эмшэн Байгалай эмшэдэй колледж дүүргэһэн байна. Недондо жэл Хориин аймагай түбэй больницада ажалда ороод, хүдэлжэ эхилээ. Байгша оной хабар залуу гэр бүлэ хүбүүтэй болоһон байна.
-Буряад Уласай Толгойлогшо Алексей Самбуевич Цыденовта, «Единая Россия» фракциин һунгамалнуудта ехэ баяр хүргэнэб. Энэ программын ашаар, өөрын гэртэй болооб. Оройдоол, нэгэ жэл соо хүдэлжэ ябанаб, тиигээд гэр абаһандаа, аргагүй баяртайб. Үдэр һүнигүй ажалдаа байхадаа, гэр бэдэрхэ сүлөөгүй байгааб. Аймагай захиргаан энэ талаар ехэ туһалаа. Хани нүхэртэйгөө суг түрэл нютагтаа бусажа, ажал хэхэ гэжэ шиидэһэн байнабди,-гэжэ Иван Ланцов хэлэнэ.
Буряадай Толгойлогшо Алексей Цыденов албанайнгаа хэрэгээр Хориин аймаг һаяхана ошоходоо, залуу гэр бүлэтэй уулзаһан байна.
Хориин ЦРБ-эйн ахамад эмшэн Вячеслав Дондоковай тэмдэглэһээр, энэ ехэ хэрэгтэй программа, үшөө 8 эмшэн мэдүүлгэ үгэжэ, банкһаа зүбшэл абаад байна.
Хүдөө нютагуудта эмшэдэй дутагталгын бэрхэшээл шиидхэхэ хэрэгтэ энэ түсэл нүлөөлхэ зэргэтэй. 285 эмшэн болон 301 дунда мэргэжэлтэй эмшэд аймагуудай больницада хэрэгтэй гээд Буряадай элүүрые хамгаалгын яаманай 2020 оной тоо баримтанууд харуулна.
