Апрелиин 11-дэ, гарагай 1-дэ, Буряад Уласай Толгойлогшо Алексей Цыденов Буряад Уласта баридаг «Озёрный» ГОК гэжэ түсэлэй мажоритарна акционер Владислав Свибловтай Москвада уулзаба. Мүн баһа энэ уулзалгада үнэтэй эмшэлгэдэ хэрэгтэй дүрбэн һаратай Адиса Гармаевагай түрэлхид байгаа. Гармаевтанай бүлэ гарагай нэгэнэй үглөөгүүр Алексей Цыденовэй урилгаар Москва хото ниидэжэ ошоо.
Озёрно уурхай ашаглаха түсэлэй эзэн гүрэнэй татабарияа Буряад Уласай бюджедтэ оруулхын тула Яруунын аймагай Озёрный һууринда бүридхэлдэ орохо шиидхэбэри абаа. Владислав Свиблов НДФЛ-эй зарим хубииень Адиса Гармаевагай эмшэлгэдэ шэглүүлэе гэжэ Буряадай Толгойлогшодо дурадхал оруулаа.
- Буряад оронтой бидэ удаанаар холбоотой болообди, тиимэһээ эндэ паспортаараашье өөрын хүн болохомни – нэн түрүүн минии олзын татабари республикын бюджедтэ орожо байхын тула. Багахан Адиса Гармаевагай хүндэ байдалда ороод байhыень ойлгожо, НДФЛ-һээ май-июнь һарануудта уласай бюджедтэ орохо мүнгэн зөөриин зарим хубиие ZOLGENSMA гэжэ препарат абалгада эльгээе, - гэжэ Владислав Свиблов Буряадай Толгойлогшодо хандаба. Алексей Цыденов Владислав Свибловтэ баярые хүргөөд, Адисын түрэлхидтэ республикын һан жасада ороһон мүнгэ хайшан гэжэ препарат абаха хэрэгтэ оруулагдахаб гэжэ ойлгуулаа.
