Буряад Уласай Арадай Хуралай hунгамал ба Сибириин МРСК-гай Россетиин филиалай захирал Сергей Козлов албанай хэрэгээр Муяын аймаг гараба. Аймагай түбтэ Таксимогой РЭС-эй ажалшадаар уулзалга дээрэ зайн галай үйлэдбэриин ажал ябуулга ба хүгжэлтын асуудалнууд тухай зүбшэн хөөрэлдөө.
- Иимэ ажал түсэбэй ёhоор хододоо ябуулагдаха. Хойто аймагуудаар, илангаяа Муяын аймагта заhабарилгын ажалай хэмжээн ехэ болохо, юундэб гэхэдэ, зайн галай hужаагай байдал ехээр хуушаранхай, -гэжэ Сергей Козлов тэмдэглэнэ.
Һунгамал Муя ба Усть Муя гэhэн тосхонуудта хүрэжэ, аймагай гулваатай хамта хүн зоноор уулзалга үнгэргөө. Ажаhуугшадай табигдаhан асуудалнуудай ехэнхиниинь шиидхэгдэжэ байнхай, зариманиинь үшөө бэелүүлэгдэхэ. Жэшээнь, холын нютагуудта оптиковолоконно холбоон татагдаха тухай асуудал табигдаа, түргэн интернет hургуулинуудта хэрэгтэй болоод байна. Эмшэлгын туhа тухай асуудалнууд табигдаа. Социальна хүдэлмэришэдэй хэрэгтэй байhаниинь элирүүлэгдээ.
Национальна проектын хэмжээн соогуур нёдондо ФАП-нууд абтагдажа, холын нютагуудта дамжуулагдаа. Шэнэ hургуули барилгын асуудал hунгамалай хиналта доро байна гэжэ тэмдэглэе.
