Уулзалга мартын 15-да болохо. «Галстукгүйгөөр» уулзалга худалдаа наймаанай «Кэпиталмолл» түбтэ үнгэргэгдэхэ гээд Восток-Телеинформ Тамирай болон Залуушуулай түрын яаманай мэдээсэл дууряан дуулгана.
Асуудалнуудаа эртээнһээ тусхайтаар байгуулагдаһан телеграмм-каналай ашаар табихада болоно. Тон һонирхолтойнуудынь соностуулагдаха. Хэмжээ ябуулга үдын 16 саг 30 минута эхилхэ. 2017 ондо иимэрхүү уулзалга май һарада эмхидхэгдээ һэн. Тэрэ үедэ Буряад Уласай толгойлогшын уялгануудые дүүргэжэ байгааша Алексей Цыденов эгээл эрхим оюутадта түрүү эмхи зургаануудта ажал хэжэ һурахыень туһалхаб гэжэ найдуулаа һэн. Тиихэдэ зуу гаран оюутан, дээдэ һургуулинуудай ректорнууд, яаман сайдууд уулзалгада хабадалсаа бэлэй.
Залуушуул өөрын түсэлнүүдые дурадхажа, заримыень бэелүүлжэшье байһан тухайгаа мэдүүлээ һэн. Тэрэ тоодо - эдэбхитэй оюутадые хамжуулха тусхай агенство байгуулхые дурадхаһан БГУ-гэй оюутан Туяна Сагановагай һанамжанууд ехэтэ һайшаагдаа бэлэй гээд эндэ ябууд һануулая.
Мартын 15-да буряад Уласай Толгойлогшо Алексей Цыденов жэл үнгэрһэнэй удаа ажалайнгаа хэрэгээр Кабанскын аймаг дахин хүрэбэ. Энэ удаа нютагай зонтой дүрбэн уулзалга үнгэргөө, бэрхэшээлнүүдыень шагнаа. Тэндэ омоли загаһа барилгын хоригдоһон тухай, ариг сэбэрэй талаар эрхэ байдал тухай болоод олзын хэрэг эрхилхэ тухай гэхэ мэтэ асуудалнууд соностобо. Хамагай дунда Цыденов өөрын олзын хэрэг яажа эрхилһэн тухайгаа залуушуулда хөөрэжэ үгэһэн байна.
