Буряад Уласта шэнэ Толгойлогшын һунгагдаһанай удаа тушаалаа эзэлэлгын ëһололой гурим шэнэлэгдэхэ зэргэтэй. Тиин Арадай Хуралай апрелиин 27-до болоһон ээлжээтэй хуралдаан дээрэ тусхай хуули абтажа, олонхи дуугай ашаар нютаг можын хүтэлбэрилэгшын тангариг спикер Цырен-Даши Доржиев үргэхэ болоо.
Мүнөөдэрэй байдалаар, гүрэн түрын зиндаата «Гүрэнэй хуули абалгын (түлөөлгын) болон гүйсэдхэхы зургаануудые бүридхэхэ юрэнхы ëһонууд тухай» хуулиин дүримөөр Толгойлогшын тушаалаа эзэлэлгын ëһолол дээрэ арад зонойнгоо урда үнэн сэхэ ябаха, Ородой Холбоото Уласайнгаа, нютаг можынгоошье Конституциинуудые хазагайруулхагүй тухай тангариг баригдадаг ëһотой. Буряад Уласта энэ үйлэ хэрэгые Конституциин шүүхын түрүүлэгшэ эрхилхэ гэжэ тунхаглагданхай. Теэд шүүхын энэ сагта бүридхэгдөөдүй зандаа. Түрүүлэгшыень томилхо шэлэн абалгын шата удаанай хэрэг, сентябриин 10-да Толгойлогшые һунгалтын дүүрэтэр үрдигдэхэгүй байна.
Дээрэ нэрлэгдэһэн хуули гуримай түлөө 51 депутат дуугаа үгөө гээд тэмдэглэе.
