Буряад Уласта Арадай Хуралай ээлжээтэ сесси дээрэ Буряад Уласай ажаһуугшад өөрындураар эзэлһэн газарай участогуудые бүридхэлдэ оруулха болзорые һунааха түсэбтэй. Хуули гаргалгын зарим шиидхэбэринүүдтэ заһабаринууд ноябрь соо парламентын сесси дээрэ хаража үзэхөөр бэлдэгдэжэ байна гэжэ Восток-Телеинформ бэшэнэ.
Гүрэнэй болон муниципальна мэдэлдэ байһан газарай участогуудые түлбэригүй үгэхэ тухай урид абтаһан хууляар 2010 оной декабриин 31 болотор баригдаһан байшан гэрнүүдтэй газарай участогуудые бүридхэлдэ абалгада зүбшөөрхэ шиидхэбэри абтаһан байгаа. Тэдэниие 2015 он болотор бүридхэлдэ оруулха арга олгогдоо һэн, эдэ газарай участогууд гурбадахи нюурай эрхэһээ сүлөөтэй, онсо хэрэглээнэй бүһэлүүрһээ гадуур байһан болон бусад эрхэ нүхэсэлдэ байһан ушарта. Эзэлжэ абаһан газарнууд үсөөн болоо: Улаан-Үдэдэ 2016 ондо 6 мянга тухай тоологдожо байгаа, харин мүнөө дээрээ 500-гаад үлөөд байнхай.
Гэхэдээ хизаарлалтатай бүһэлүүрнүүдтэ баригдаһан гэрнүүдые бүрдхэлдэ абаха аргагүй байгаа – нэгэн гэхэдэ, дэбисхэрнүүд федеральна мэдэлдэ байгаа, үгы гэбэл, арюун сэбэрэй-хамгаалалтын бүһэлүүртэ байһан байгаа. Буряад Уласаар мүнөө дээрээ бүридхэлдэ абтаагүй участгууд байһаар байна, Улаан-Үдэдэ 500 участогуудһаа гадна, Ивалгын аймагта - 696, Түнхэнэй аймагта -1093. 2026 оной декабриин 31 болотор газарнуудые түлбэригүй үгэхэ тухай хуулиин хүсэндөө байлга һунааха дурадхал ороно. Энэнь Буряад Уласай онсо харууһа доро байдаг дэбисхэрнүүдтэ ажаһуудаг эрхэтэдэй газарай участогуудта эрхэ олгохо боломжо үгэнэ.
