Мүнөөдэр, ноябриин 13-да, Арадай Хуралай ээлжээтэ сесси дээрэ Буряад Уласай зарим хуули ёһоной актнуудта хубилалтанууд оруулагдаба. Гол заһалтануудай нэгэн хадаа газарай участок абаха ээлжээндэ байһан олон хүүгэдтэй гэр бүлэнүүдтэ хабаатай.
Тэдэнэр мүнөө газарай участок дээрэ нэмэжэ 100 мянган түхэригэй түлбэри абаха эрхэтэй болоо гэжэ Буряад Уласай Засагай газарай Түрүүлэгшын орлогшо Виктор Сухоруков соносхобо. Мүнөө 5837 гэр бүлэ ээлжээндэ байна, Буряад Уласай Ниигэмэй хамгаалгын яаманай хиналтаар тэдэнэй 80%-нь участогуудай орондо мүнгэ абаха һанаатай. Газарай асуудалнуудай, аграрна бодолгын, эд хэрэглэлгын заха зээлиин талаар Арадай Хуралай хорооной түрүүлэгшэ Чингис Матхеев ээлжээнэй тоо олошоржо, элдэб шалтагһаа боложо, участогууд үгтэнэгүй гэжэ тэмдэглэбэ. Дүүрэн байгууламжатай участогуудые һомолхо мүнгэн бүхы тойрогуудта үгы.
"Мэдээжэ, коммунальна хангалтануудтай, илангаяа Улаан-Үдэдэ, дүүрэн хүдэлдэг газар байгаа һаань, энэ мүнгэн гаргашануудые хангахагүй. Теэд энэ хадаа шэлэхэ эрхэ, гэр бүлэнүүдтэ туһалха алхам гэжэ тоолонобди. Үшөө тиихэдэ, демографи мүнөөдэрэй гүрэнэй бодолгын гол шэглэл болоно", - гэжэ тэрэ тэмдэглэбэ.
Тиихэдэ участогуудые хубааха асуудал шиидхэхэ гэбэл, тэдэниие мүнөө Буряад Уласай Засагай газарай тодорхойлһон хүртээмжэтэй шалгуураар инфраструктураар хангагдаха ёһотой гэжэ нэмэнэбди. Энэнь хубаариин үедэ үгтэһэн муниципальна байгууламжын хилэ доторхи инфраструктуратай адли газарнуудые хубааха боломжо олгоно. Тиихэдэ энэ хуулиин түсэлдэ ажаһуугшадые ядуу зоной бүридхэлһээ гаргаха нэмэлтэ үндэһэн нэбтэрүүлэгдэнэ. Дурадхагдаһан участогһаа гурба дахин арсаа һаань, иимэ шиидхэбэри абтаха. Энэ заалта хүсэндөө орохо шэлжэлтын хугасаа тогтоогдоо — 2026 оной 3 һарын 1 болотор.
