Улас түрын толгойлогшын байра байдал хангалтын гаргашануудые хизаарлаха тухай Буряадай Арадай Хуралда дурадхагдаба. Иимэрхүү хэмжээн орон можо дотор тогтоһон шахардуу байдалһаа һабагшатай, улас түрын һангай мүнгэ гамнаха ябуулга болоно гээд ойлгууламжын дансо соо хэлэгдэнэ.
Коммунист- һунгамал Баир Цыреновай «Буряад Уласай толгойлогшо тухай» Хуулида хубилалта оруулха тухай үүсхэл удаадахи, 18-дахи сессиин үзэмжэдэ табигдажа магад. Тэрэнь июнииин 23-да болохо юм. Хуулин түсэлөөр «улас түрын толгойлогшын байра байдал хангалтын үлүү гаргашануудые хизаарлаха, хэрбээ тэрэнэй һара бүриин олзо Буряад Уласта тогтоогдоһон бага зэргын салингай хэмжээнһээ 30 дахин ехэ байгаа һаань» гэжэ дурадхагдана. Хуули ёһото баримтануудаар, 2015 ондо улас түрэдэ дунда зэргын салин 28278 түхэриг бүридүүлнэ, гэхэтэй хамта толгойлогшын олзо энэ хугасаа соо табан сая шухуу түхэриг бүридүүлээ гээд данса дотор хэлэгдэнэ.
«Тэрэ үедэ Буряадай дунда шадалтай ажаһуугша байрынгаа түлөө, гэрэй, унаанай, элүүр байдалаа хангалтын гэхэ мэтын бүхы гаргашануудаа өөрын мүнгэнһөө түлэхэ баатай», - гэжэ хуулиин түсэл дотор тэмдэглэгдэнэ.
