Буряадтамнай «Baikal Travel Mart 2022» гэһэн аяншалга хүгжөөлгын хуралдаан 2003 онһоо үнгэргэгдэдэг юм. Тус хуралдаанай гаршаг доро сугларһан эмхи зургаанууд өөрынгөө дурадхалнуудые олондо мэдүүлнэ, ерэһэн айлшадай дүй дүршэлтэй танилсана. Нэгэ шэглэлээр ажалаа зохёожо ябаһан мэргэжэлтэдтэ тон хэрэгтэй хэмжээ ябуулга хэдэн үдэрэй туршада Улаан-Үдэ хотодомнай эмхидхэгдэбэ.
Тус яармаг харалганда хабаадалсаһан, юрэ оролсоһон олзын хэрэг эрхилэгшэд алишье талаһаа аша туһатай хэлсээнүүдые баталжа, саашадаа ажалаа нэгэдхэн ябуулха болобо. Хари гүрэнүүдэй болон нютагай аяншалга хүгжөөлгын һалбарида хүдэлдэг эмхинүүд 9 хэлсээндэ гар табиба.
- Буряад Уласай Засагай газарай талаһаа энэ хуралдаанда хабаадагшадые болон айлшадые хани халуунаар амаршалнаб. Засагай газарһаа али болохо туһаламжа, дэмжэлтэ аяншалгын һалбарида үзүүлэгдэжэ байдаг. Байра байдал түхеэрхэ талаар хэдэн түсэлнүүд зохёогдонхой. Тусхайтаар олон айлшад ерэдэг болонхой. Монгол оронтоёо нягта харилсаатайгаар ажалланабди, - гэжэ Засагай газарай Түрүүлэгшын орлогшо Иван Альхеев яармагай үедэ үгэ абахадаа хэлэбэ. Үнгэргэгдэжэ байһан олон тоото хэмжээ ябуулганууд һайн үрэ дүнтэй байжа, холо ойрын айлшад үдэр бүри олошоржо, Буряад һайхан оронииемнай һайхашаан үзэжэ байхань болтогой!
«Baikal Travel Mart 2022» хэмжээ ябуулга Байгал шадархи можо нютагуудай ажаһуугшадта тон шухала үйлэ хэрэг болоно. Түрэл һайхан тоонто нютагтаа холо ойрын айлшадые угтан абажа, гоё һайханаа үзүүлхэдээ, нютагаархиднай олзо оршо оруулна гэжэ ойлгонобди. Үндэр хэмжээндэ амаралтаяа үнгэргэһэн айлшад манай нютаг дахин-дахин эрьен ерэхэнь дамжаггүй. Эгээл тиимэһээ аяншалгын ба амаралтын һалбариин мэргэжэлтэд нэгэ газарта суглархадаа, тэдэнэй урда тохёолдодог бэрхэшээлнүүдые яажа шиидхэхэб, юугээр айлшадые һонирхуулхаб гэхэ мэтэ асуудалнуудта харюу бэдэрэн, ажалаа зохёобод. Эхэ ороноймнай олон тоото можо нютагуудай айлшад, молор һайхан Монгол ороноймнай хүндэтэй аха дүүнэрнай, мүн тиихэдэ Буряадаймнай 14 аймагай түлөөлэгшэд тус хуралдаанай сэргэдэ хүрэжэ ерэһэн байна. Монгол ороной аяар 21 эмхи өөрынгөө ажалнуудтай танилсуулна, аяншалгын талаар дурадхалнуудые оруулна.
