Буряад Уласай түргэн туhаламжын ба эхин шатын бүлэгэй эмшэд хүүгэдэй сэсэрлигүүдтэ үнэмшэлгэ ээлжээгүйгөөр абаха эрхэтэй болобо. Ород Уласай Юрэнхылэгшэ Владимир Путинай захиралаар эхин шатын бүлэгэй ба түргэн туhаламжын эмшэдтэ (хотын поликлиникын ба аймагуудай түбэй эмнэлгын газарай) социальна тэдхэмжэ хүргэхын тула байгаа ушарта таараhан хуулиин түсэб бэлэдхэгдээ.
Элүүрые хамгаалгын яаманай сайд Евгения Лудуповагай хэлэhээр, эмшэдые болон тэдэнэй гэр бүлын гэшүүдые дэмжэхэ социальна нэмэлтэ хэмжээ ябуулгануудые нэбтэрүүлхэ хэрэгтэй. Мүнөө сагта Буряад Уласай эмшэд hургуулиин урдахи болбосоролой эмхи зургаануудта ээлжээгүйгөөр үнэмшэлгэ абаха тусхай эрхэгүй, тиимэhээ булта зоной ээлжээндэ байна. Эмнэлгын зургаануудай тоо баримтаар эмшэдэй бүлэнүүдтэ 2020 оной сентябриин 1-нэй байдалаар 532 үхибүүд хүүгэдэй сэсэрлигүүдтэ бүхы зоной хамтын ээлжээнэй бүридэлдэ абтаhан байна. Тэдээн сооhоо – 410-ниинь Улаан-Yдэ хотодо, 122-ынь уласай аймагуудта.
Энэ хуулиин түсэб Арадай Хуралай ээлжээтэ хуралдаан дээрэ үзэмжэдэ табигдаха.
