Арадай Хуралай hунгамалнуудые үхибүүдэй омбудсменэй тушаалда дэбшүүлэгдэhэн Наталья Ганькинатай танилсуулба. Һунгамалнууд кандидатhаа энэ ажал ябуулгын гол шэглэл тухай хараа бодолоорнь hонирхобо. Наталья Ганькинагай хэлэhээр, нэн түрүүн энэ ажалда – үхибүүдэй элүүр энхые, ами наhа аршалалга, үншэн ба гэртэхинэй харууhагүй үлэhэн үхибүүдые дэмжэлгын хэмжээ ябуулганууд, хуули эбдэhэн үхибүүдээр ажал болоно гэжэ Арадай Хуралай мэдээсэлэй албан дуулгана.
- Гол шэглэл – эрхэтэдэй хандалгатай танилсалга, хүн зонтой асуудалаарнь уулзалга, аймагуудаар албанай хэрэгээр ябалга. Албанай хэрэгээр ябажа, хүн зонтой уулзахадаа, үнэн байдал харахадаа, хүндэ орёо асуудалнуудые тэрэ дороо шиидхэхэдэ үрэ дүнтэй,- гэжэ Ганькина хэлэбэ.
Дэбшүүлэгдэhэн хүн үхибүүдэй эрхэ хамгаалха этигэлэй эрхэтэйшүүлдэ сэхэ сүүдтэ хандаха эрхэ үгэhэн 2019 ондо абтаhан хуули дэмжэнэ.
Хорооной түрүүлэгшэ Игорь Марковец омбудсмен гүрэнэй ажалдаа захиргаануудтай нягта холбоотой хүдэлхэ ёhотой гэжэ онсолбо. Гүрэнэй дээдэ хуралай гэшүүд нэгэ дуугаар Наталья Ганькинагай дэбшүүлгэ дэмжэбэ.
Наталья Ганькина юридическэ мэргэжэлэй дээдэ hургуулитай. 12 жэлэй хугасаа соо уласай прокуратурада хүдэлhэн. Мүнөө толгойлогшын захиргаанай ба Уласай Засагай газарай гүрэнэй-эрхэ хуулиин хорооной коррупцитай тэмсэлгын таhагай даргаар хүдэлнэ.
