Буряад Улас дотор олон үхибүүтэй бүлэнүүдые транспортын гүрэнэй татабариhаа сүлөөлхэ – иимэ хуулиин тогтоол Буряад Уласай Арадай Хуралай ээлжээтэ хуралдаан дээрэ зүбшэн хэлсэгдэхэ гэжэ түсэблэгдэнэ. Буряад Уласай Социальна хамгаалгын яаманай бэлэдхэhэн хуулиин тогтоолоор олон үхибүүтэй бүлын нэгэ гэртэхинэй бүридэлдэ табигдаhан нэгэ хүнгэн машинаныень транспортын гүрэнэй татабариhаа сүлөөлхэ гэжэ хараалагдана.
- Гурбанhаа олон үхибүүтэй бүлэнүүд ехэнхидээ олон hууритай машина абадаг гээшэ,- гэжэ Буряад Уласай Социальна хамгаалгын яаманай сайдай уялга дүүргэгшэ Анастасия Меринова тэмдэглэбэ.
Эдэ зониие 2021 ондо түлэгдэхэ 2020 оной татабариhаа сүлөөлхэ гэжэ табигдана. Уридшалhан тоолоолгоор олон үхибүүтэй бүлэнүүд бүхы улас дотор хамта дээрээ 30,2 миллион түхэриг алмаха. Энэ хуулиин түсэл Арадай Хуралай ээлжээтэй хуралдаан дээрэ хараалагдаха.
Буряад Уласта электричекэ хүдэлгүүртэй унаатайшуул транспортын татабари түлэхөө болинхой гэжэ hануулая. Yшөө транспортын гүрэнэй татабариhаа 100 моринhоо дээшэ бэшэ шадалтай унаатай Советскэ Союзай Геройнууд, Ород Уласай Геройнууд, Социалис Ажалай Геройнууд, Ажалай ба Алдар Солын гурбан шатын орденоор шагнагдаhан зон, Эсэгэ ороноо хамгаалгын Агууехэ дайнай ветеранууд, Чернобылиин катастрофада орогшод татабари түлэхэгүй. I-II –дохи группын инвалидууд 50% татабариhаа сүлөөлэгдэнхэй.
