Баунтын, Зэдын, Захааминай, Ахын аймагуудай засаг дарганууд ба тэдэнэй орлогшод, Северобайкальск хотын Захиргаанай Толгойлогшо Бүхэроссиин хүн зониие бүридхэн бэшэлгын бэлэдхэлдэ хэһэн ажал тухайгаа хөөрэбэ. Энэ хэлсээн июлиин 9-дэ Буряад Уласай Засагай газарай түрүүлэгшын 1-дэхи орлогшо Игорь Зураевай ударидалга доро Бүхэроссиин хүн зониие бүридхэн бэшэлгэ үнгэргэлгын уласай комиссиин суглаан дээрэ үнгэрөө гэжэ Восток-Телеинформ бэшэнэ.
Энээнэй хажуугаар, Баунтын ба Ахын аймагуудай холын ба ошожо хүрэхэ бэрхэтэй газарнуудай список бүрилдүүлэгдэбэ. Энэ газар һууринуудта хүн зониие бүридхэн бэшэлгэ табигдаһан болзорһоо ондоо сагта үнгэрхэ.
Газар дэбисхэрэй хүгжэлтын захиргаанай түрүүлэгшын орлогшо Пётр Касьянов Бүхэроссиин хүн зониие бүридхэн бэшэлгэдэ бэлэдхэл тухай элидхэл хэбэ. Илангаяа, Улан-Yдэ хотын Октябрьска аймагай захиргаан аймаг соогоо 2162 гэрнүүд зүбшөөлгүйгөөр баригданхай, урагшагүй, муу байдалтай 88 бүлэнүүд байна гэжэ мэдээсэл тодорхойлоо. Тэрэнэй тэмдэглэһээр, үйлсын нэрэнүүдэй ба гэрнүүдэй дугаарнуудай дутагдал элирүүлэгдэжэ, Хотын ажахын хороон рекламна агенствотай хаягай таблицануудые бүтээлгын хэлсээ баталаа. Урдахи хүн зониие бүридхэн бэшэлгэдэ хабаадаһан дүй дүршэлтэй 285 хүнүүд саг зуурын ажалда абтаа гэжэ Пётр Касьянов үшөө тэмдэглэбэ.
Нютаг засагай байгууламжануудай түлөөлэгшэд арад зониие бүридхэн бэшэлгэдэ хабаадахын тула хэһэн ойлгууламжын ажал тухай мэдээсэлтэй хубаалдаба гэжэ Восток-Телеинформ бэшэнэ.
