Буряад Уласай аймагуудай нютаг засагай захиргаануудай болон һуурин тосхонуудай засаг даргануудта адресна ажахыдаа ёһо гуримтай болгохо ажал түргэлүүлхэ гэжэ дурадхагдаа. Yнгэрөөшэ долоон хоногой эсэстэ тэдэнтэй зүблэлдэхэ суглаан видео-конференциин харилсаа холбоогоор үнгэрөө. Энэ зүблэлдэхэ суглаан дээрэ бүхэроссиин хүн зоной тоо бүридхэн бэшэлгэ үнгэргэхэ шэнэ болзор саг тухай зүбшэн хэлсэгдээ гэжэ Восток-Телеинформ дуулгана.
Yшөө тиихэдэ, 2020 оной июлиин 14-нэй Буряад Уласай «2020 оной Бүхэроссиин хүн зониие бүридхэн бэшэлгын бэлэдхэл ба үнгэргэлгэдэ Буряад Уласай Нютагай Засагай байгууламжануудай нютагай өөһэдын хүтэлбэринүүдтэ тусхай гүрэнэй эрхэ этигэл олгохо тухай» («О наделении органов местного самоуправления муниципальных образований в Республике Бурятия отдельными государственными полномочиями по подготовке и проведению Всероссийской переписи населения 2020 года») гэһэн хуули тухай зүбшэн хэлсэгдээ. Энээнэй хажуугаар, суглаан дээрэ бүридхэн бэшэлгэдэ адресна ажахын байдалай бэлэн болоһые хараада абаа.
Буряад Улас дотор хүн зониие бүридхэн бэшэлгэ бүхэнэй урда адресна ажахын орёо асуудалнууд гарадаг гэжэ тэмдэглэлтэй. 2009 ондо, 2010 оной бүридхэн бэшэлгын урда баһа улас дотор адресна ажахые гуримшуулха ажал хэгдээ: 30% дуталдаһан үйлсын нэрэнүүд, 21% гэрнүүдэй, 27% байрануудай дугаарнууд үлгэгдөө, шэнэлэгдээ. Баргажанай, Бэшүүрэй, Зэдын, Яруунын, Загарайн, Ивалгын, Хурамхаанай, Муяын аймагуудта, Северобайкальск хотодо адресна ажахые эмхидхэлгын эдэбхитэй ажал ябуулагдаһан байна.
Энэ асуудал мүнөө тусхай удха шанартай. Юундэб гэхэдэ, мүнөө жэлэй бүридхэн бэшэлгэ тоо мэдээгэй түхэлтэй. Госууслугын портал дээрэ бүридхэн бэшэлгэдэ орохо арга бии болонхой. Тиимэһээ, байрануудай дугаарлал Холбоото уласай мэдээсэлгын адресна системын (ФИАС) хаягуудай дансатай тааруулан хэхэ хэрэгтэй.
