Буряад Уласта 1941-1945 онуудай Эсэгэ ороноо хамгаалгын Агууехэ дайнай 75 жэлэй Агуу Илалтын ойдо дашарамдуулан, зарим эрхэтэндэ 10 мянган түхэриг үгтэхэ түлбэри тухай хуулиин түһөө Арадай Хуралай ээлжээтэ сесси дээрэ харалгада абтаха. Эндэ Буряад Уласай эрхэтэд - дайнай ветеранууд, тэдээндэ адли эрхэтэйшүүл болон ара талын ажалшад тухай хэлэгдэнэ.
Тиигэжэ, Эсэгэ ороноо хамгаалгын Агууехэ дайнай ветеранууд ба инвалидуудта 10 мянган түхэригэй түлбэри тогтоохо гэжэ дурадхагдана. 1941 оной июниин 22- һоо 1945 оной майн 9 болотор ара талын ажалда хахад жэлһээ бага бэшэ болзор соо хүдэлһэн, мүн СССР-эй оккупацида ороһон газарта хүдэлһэн сагһаа бэшэ, Эсэгэ ороноо хамгаалгын Агууехэ дайнай үедэ СССР-эй орден ба медальнуудаар үнэн шударгы ажалай түлөө шагнагдаһан ара талынхидта 5 мянган түхэригэй түлбэри тогтоохо гэжэ дурадхагдана.
2020 оной февралиин 1-нэй тоо баримтаар Буряад Уласта Эсэгэ ороноо хамгаалгын Агууехэ дайнай 200 ветеранууд ба инвалидууд, 5045 ара талын ажалшад ба «Житель блокадного Ленинграда» гэһэн тэмдэгээр шагнагдаһан 14 зон ажаһуудаг гэжэ тэмдэглэе. Энэ тэдхэмжэ бэелүүлгэдэ 27,4 миллион түхэриг хэрэгтэй болохо гэжэ урид дүн тоологдобо. Мүнгэнэй түлбэри республикын бюджетһээ оложо һомологдохо.
Энэ асуудал март һарын сесси дээрэ харалгада абтаха.
