Баяр ëһололой оршондо хүүгэдэй «Снежинка» сэсэрлиг ноябриин 28-да дахин нээгдэбэ. «Хойто жэл «Снежинка» сэсэрлиг 45-дахи ойгоо угтаха. Удаан энэ хугасаа соо һургуулиин наһа гүйсөөдүй хүүгэдэй тус эмхи нэгэшье заһагдаагүй байгаа. Харин мүнөө Ородой Холбооной Юрэнхылэгшын нөөсэ жасын ашаар хүүгэдэй энэ сэсэрлиг «наһаяа һунааха» аргатай болоо. «Снежинка» сэсэрлигтэ ябажа байһан, хожомоо ябажа байхашье багашуулаа болоод тэдэнэй түрэлхидые амаршалнаб», - гээд Александр Голков тэмдэглээ һэн.
Анхандаашье хотын захирагша гүрэн түрын һанһаа мүнгэнэй гаргашалагдажа байдагые ехэтэ онсологшо бэлэй. Эгээл иимэ аша аргаһаа хотомнай улад зонойнгоо ажабайдал зохëохо асуудалнуудые дэмы урьһаламжагүйгөөр шиидхэхэ оньһотой байдаг гээд тэрэ бодомжолно. Заһабарилгын ажалнуудта үнөөхи жасаһаа 35,7 сая түхэриг гаргашалагдаа. Тэрэ мүнгөөр хүүгэдэй сэсэрлигэй нюур тала дулаалагдаа, амилуулха, дулаасуулха хэрэгсэлнүүд һэлгэгдээ, мүн хангалтын бусадшье хабсаргалтанууд һэльбэн шэнэлэгдээ. Газаахи хото хорëоншье болбосоруулагдаа – элһэнэй талмаг, һууха һарай, наадаха бүтээлнүүд, дүүжэндүүр, зүгөөр оршонхи дэбисхэр асфальтаар хушагдаа гэхэ мэтэ. 800 мянганай табсан шэрээнүүд, хубсаһаяа хуряаха үлгэсэнүүд абтажа табигдаа.
Бэе муутай үхибүүдтэ пандус, орохо гарахын үүдэнүүдш тусайтаар зохëогдоо. Дүн хамта 27 сая түхэриг заһабарилгада шэглүүлэгдэһэн байна. Мүнөө сагта «Снежинка» сэсэрлигэй 12.
бүлэгтэ 392 үхибүүн хүмүүжүүлэгдэнэ. Тэндэ 63 хүдэлмэрилэгшэ, тэдэнэй 22-нь багша мэргэжэлтэн мүн.
