Тэдэ бүгэдэ 62 сая гаран түхэриг абаха юм байна. Ниитын хэрэг эрхилэгшэ эмхинүүдһээ дүн хамта 72 мэдүүлгэ ороһон байгаа, тэдэнэй дундаһаа шалгарһан 16 түсэлдэ 40 сая гаран түхэригэй элдэб янзын грантнууд дамжуулагдаха жэшээтэ й. Эгээл бага сэнтэйнь гээ һаа, 354 мянган түхэригтэ болоно, харин эгээл үнэтэйнь гэбэл, аяар 7,411 саяда шахана. Юрэнхыдөө, хоëр шатаһаа бүридэһэн тэрэ урилдаанда 28 хабаадагша илагшададай тоодо нэрлэгдээ.
Тэдэнэй дунда - «Багахан нютагуудта зохëохы урлал хүгжэг!» гэһэн Татьяна Черныхай түсэл бэелүүлгэдэ 5,5 сая түхэриг үгтэхэ. Тус түсэлэй гол зорилго - улас оронойнгоо багахан зэргын 128 нютагта ажаһуудаг хүүгэдтэ урлаха арга нүхэсэлнүүдые олгуулха мүн. Удаадахи илагша – «Буряад уласай энхэ элүүр байдал» гэһэн ниитэ жаса – абаһан мүнгэеэ сэдьхэлэй үбшэндэ дайрагдаһан үхибүүдые зоной дунда дадхааха хэрэгтэ шэглүүлхэ хүсэлтэй. Тэрээнһээ гадна, Ивалгын дасанай дэргэдэ үзэсхэлэнтэй музей байгуулха түсэл мүн лэ шалгарһан байна.
Тиихэдэ, Байгал далай шадарай аймаг нютагуудта түймэрэй аюулһаа сараха талаар зүдхэмжэ баһал грантын дэмжэлгэдэ хүртэхэ болобо. Ород – япон оронуудай хоорондохи харилсаа бэхижүүлхэ һанаанһаа европо-ази түбинүүдэй баледэй хатаршадай урилдаа эмхидхэхэ түсэл мүн лэ эндэ онсо шалгараа. Тэрэшэлэн, Ородой уласай оршондо анха түрүүшынхиеэ «Дайшалхы түүхын фильмнүүдые табиха Сибириин урлалай зохëохы мастерскай» гэжэ байгуулагдаха болоо.
Нëдондо, 2017 ондо улас дотороо олзо хараалаагүй, коммерческэ бэшэ 25 эмхи юрэнхылэгшын нэрэмжэтэ грантнуудта хүртэхэ урилдаанда хамта дээрээ 46,869 сая түхэригтэ хүртөө бэлэй гээд эндэ һануулха шухала.
