Ородой уласай Засагай Газар өөрын нөөсэ жасаһаа «Улаан-Үдэ-Турунтаево-Хурамхаан-Шэнэ Уоян» гэһэн харгы барилгада нэмэри мүнгэ гаргашалхань. «Турунтаево – Хурамхаан» гэһэн харгы заһабарилгада гэжэ 350 сая түхэригэй туһаламжа наашаа шэглүүлэгдэхэ болобо. Тэрэ мүнгэн Макарино һууринһаа Адамово, Зорино хоëрой хоорондохи зай хүрэтэр харгы татаха хэрэгтэ дамжуулагдаха гээд Буряадай Толгойлогшо Алексей Цыденов соносхоо. 2017 ондо Ородой Юрэнхылэгшэ Владимир Путин энэ авто харгые саашань заһабарилхыень даабари үгэһэн байгаа гээд һануулая. Уласай түб Улаан-Үдэ хотые табан аймагтай холбодог 726 модо утатай энэ харгы улад зондо амин хэрэгтэй.
Үнөөхи тэрэ харгы 2003 онһоо ходол заһагдажа байһан удхатай. «Ородой тээбэриин байгууламжа хүгжөөхэ», «Алас Дурны зүг болон Байгалай үбэрэй орон нютугуудые хүгжөөхэ» гэхэ мэтэ тусхай зорилгото федерально программануудаар тэрэ хангагдажа байгаа. 2003 онһоо 2011 он болотор харгы заһабарилгада дүн хамта 4,3 миллиард түхэриг шэглүүлэгдэһэн байна. 2014 ондо 11 модоной зай ашаглалгада тушаагдаба. 2016 ондо – 3 модо, 2017 ондо – 14,7 модоной зай тушаагдаа. Тиин тиигэн, энэ сагта 13-һаа 230 километр болотор болоод 251 – 271 километрай участогуудта хамта дээрээ 235,9 километр авто-харгы ашаглалгада тушаагдаһанда тоологдоно. 2013 ондо 268 километртэ Баргажан мүрэн дээгүүр хүүргэ татагдаа. Тэрээндэ 2 миллиард түхэриг дамжуулагдаа һэн. Хүүргын зай утаашаа 5,436 модо бүридүүлнэ.
Ородой Холбооной Тээбэриин яаманай мэдээгээр, удаадахи болзорой бюджедтэ 2021 болотор «Улаан-Үдэ – Турунтаево – Хурамхаан – Шэнэ Уоян» гэһэн харгы саашань барилгада нэмэри 5 миллиард түхэриг һомологдохо болонхой.
