Буряад Уласай «Эдэй корзина (шээзгэй) тухай» Хуулиин 4-дэхи хүсэнэгтэ хубилалтануудые оруулха тухай түсэл Арадай Хуралай ээлжээтэ хуралдаан дээрэ зүбшэгдэхэ юм ха. Юуб гэхэдэ, гүрэн түрын «Ородой Холбооной уласта ажамидаралгын сэн тухай» №134-ФЗ гэһэн хуули ëһые болон Буряад Уласай «Эдэй шээзэгэй тухай» хуулиин 1-дэхи хүсэнэгэй эрилтэнүүдые бэелүүлхэ хэрэг мүнөө гаранхай. Эдэ хоëр хуулиин үнөөхи эрилтэнүүдэй ëһоор, «эдэй шээзгэйн» хэмжээн табан жэлэй нэгэ удаа шэнээр багсаамжалагдажа байха жэшээтэй, эгээл энэ саг болзорынь дүтэлбэ. Дээрэ дурдагдаһан түсэлые Буряад уласай Эдэй яаман зохëожо, сентябриин хуралдаанай үзэмжэдэ табина гэжэ удхалая.
«Эдэй шээзгэй» тухай мүнөө байгааша хуули ëһо Буряад уласта 2014 оной январиин 1-дэ абтаһан байгаа, тиигэжэ шэнээр багсаамжалагдаха болзорынь 2019 оной январиин 1-дэ хүсэхэ гээд тэмдэглэлтэй. Гүрэн түрын 2012 оной хууляар табигдаһаар, «эдэй шээзгэй» 2020 оной декабриин 31 болотор һунаагданхай юм. Үшөө гурбан жэл тэрэ хүсэндөө байха жэшээтэй. Тиимэһээ Буряад уласта тэдхэмжэлэгдэдэг зоной (ажал хэхэ наһатанай, пенсионернүүдэй, хүүгэдэй) «эдэй шээзэгэйе» мүн лэ гурбан жэлээ һунааха тухай дурадхагдана.
«Эдэй шээзэгэйн» бүридэлдэ, нэн түрүүн, эдеэ хоол – 50%, тэрээнһээ гадуур, гутал хубсаһан, эм домууд оролсоно. Мүн гурбадахи хубииень гэр байрын, унаа тээбэриин, соëлой хэмжээ ябуулгануудай гэхэ мэтын хангалтанууд бүридүүлнэ. Юрэнхыдөө, «эдэй шээзэгэй» хүн зоной байра байдал гүйсэд хангама эд зөөринүүдһөө имагтал бүридхэгдэдэг. Тэдэнэй хэм Роспортебнадзороор баталагдаха зэргэтэй.
