«Буряад Уласай эдэй засагай хүгжэлтэдэ залуушуулай оруулмаар хубита» гэһэн парламантын уншалганууд Арадай Хуралда үнгэргэгдэбэ. Тэндэ һунгамалнуудһаа гадна Засагай Газарай болоод аймаг нютагуудай захиргаанай гэшүүд, залуу эрдэмтэд, олзо эрхилэгшэд ба оюутадай бүлгэмүүдэй түлөөлэгшэд хабаадалсаа. Уншалгануудай үдэр Арадай Хуралай байшангай нэгэдэхи дабхарта бага олзын шэнэ маягаар бүридхэгдэһэн үйлэдбэринүүдэй үзэсхэлэн түрүүшынхиеэ нээгдэһэн байгаа.
Парламентын уншалгануудай урда нилээд горитой бэлэдхэлэй ажал ябуулагдаа гээд тэмдэглэлтэй. Тиин засагай бүхы хэмжээнэй зургаануудта тусхай дурадхалнууд зохёогдоһон байна. Тэрэ дансада дүн хамта 20 гаран дурадхал ороо. Эдэ заабари дурадхалнууд удаадахи долоон хоногой туршада улам наринаар бүридхэгдэжэ эльгээгдэхэ газарнуудтаар эльгээгдэхэ. Жэшээнь, хоёр хүсэл дурадхал Гүрэнэй Дүүмэдэ һуудаг Буряадай депутадуудта дамжуулагдаха юм ха. Тэрэ дурадхалнууд гэбэл, Хойтын Хизаар захын аймагуудта табан жэлэй туршада ажал хэдэг 30 наһа гүйсөөгүй залуушуулда салин хүлһэндэнь тусхай нэмэлтэ хараалха тухай заһалта гүрэн түрын хуулида оруулха үүсхэл зууршалхыень баадхагдаба.
Юрэнхыдөө, залуушуулай бэрхэшээлнүүдые зүбшэн хэлсэхэ тухай тус эдэбхи үүсхэл Арадай Хуралай Нютаг можо хоорондын холбоонуудай, үндэһэтэнэй асуудалнуудай, залуушуулай засаг түрын, олониитын ба шажан мүргэлэй нэгэдэлнүүдэй талаар хороон эрхилһэн байгаа гээд тэмдэглэе. Энэ хорооной түрүүлэгшэ Цыденжап Батуевай хэлэһээр, хүдөө нютагуудһаа залуушуул нүүжэ ошоно, илангаяа, хойто аймагуудта залуушуул тогтоногүй. Тиигээдшье, Засагай Газарташье, Арадай Хуралдашье ямар аймагта хэды залуушуул ажалаар хангагданхайб гэжэ бүрин мэдээн үгы байха, гээд Батуев тобшолбо. Тиимэһээл боложо, Буряад уласай эдэй засагай байдалда залуушуулай нүлөө тухай асуудал эндэ табигдаһан байна. Гол түлэб хүдөө ажахыда, мүн бага ба дунда зэргын шэнэ маягаар хүдэлдэг үйлэдбэриин эмхинүүдтэ тэдэнэй оруулмаар хубита хараада абтаба. Эгээл эдэ һалбаринуудта ажалыень зохёожо үгөө һаа, залуушуул тааража хүдэлхөөр гээд Арадай Хуралай Хорооной түрүүлэгшэ этигэлтэй.
