Буряад Уласай Засагай Газар улас түрын мүнгэн һангай гаргашануудые хоёр миллиард түхэригөөр бага болгохо тухай хуулиин түсэл зохёожо байна гээд һурагтай. Тэрэнь Арадай Хуралай апрелиин 21-дэ зарлагдаһан удаадахи хуралдаан дээрэ зүбшэгдэхэ.
Парламентын түрүүлэгшэ Цырен Доржиевай мэдээсэһээр, улас түрын мүнгэн һангай хэр гүйсэдхэгдэжэ байһан тухай тоосоон май һарада бэлэн болохоор багсаамжалагдана. Эгээл энэ сагта ажахынуудай жэлдээ оруулһан налогуудай хэмжээн имагтал элирдэг.
Бюджет хяһаха тухай данса Арадай Хуралай үзэмжэдэ оруулагдажа, хороонуудаарнь наринаар шэнжэлэгдэхэ, тиин заһалта хубилалтануудтайгаар Засагай Газар руу дахяад бусаагдаха. Одоол тиигэһэнэй һүүлээр сессидэ табигдаха юм.
Анхан манай дуулгаһаар, 2016 ондо республикын мүнгэн һанда 41 млрд. 650 сая түхэриг хараалагдаһан байна. Тэрэнэй 17 млрд. 676 саянь олзо оршын хуби, зүгөөр гаргашань 44 млрд. 21 сая бүридүүлбэ һэн. Эндэһээ уламжалан харахадамнай, 2 млрд. 370 сая мүнгэн бюджедэй дефицит болоно. Олзо оршо энэ жэлдэ урда жэлэйхидэ орходоо нэгэ млрд. түхэригөөр доошолхоор хүлеэгдэнэ. Буряад Уласай мүнгэн һан юрэнхыдөө хүн зониие хангаха хэрэгтэ гол түлэб гаргашалгдахаар түсэблэгдэнхэй. Жэшээнь, гүрэн түрын 19 программа бэелүүлхын тулада дүн 42 млрд. түхэриг һомологдонхой һэн гэбэл, тэрэнэй 68,9 хубинь гэхэ гү, али 30 млрд-нь хүн зоной ажаһуудал хангаха хэрэгтэ – һуралсалда, элүүрые хамгаалгада, соёлдо, буряад хэлэ сахилгада, Буряадай үндэһэ яһатануудай хүгжэлтэдэ г.м. хараалагданхай.
