Буряад орондо абтаһан зоргондоо табиһан гэрнүүд тухай хуули Россиин Дээдын шүүхэдэ зүбшөөгдөө. Прокуратурын мүргэл энэшье удаа анхарагдабагүй. Тиигэжэ Буряад Уласай 115 дугаартахи «Хубиин мэдэлдэ газарнуудые түлбэригүйгөөр үгэхэ тухай» Хуулида 2001 он болотор зоргондоо баригдаһан гэрнүүдые дансалха арга олгуулһан хубилалта оруулха тухай хуули хүсэндөө үлэбэ. Энээн тухай «Восток-Телеинформ» агентствын сурбалжалагшада Улаан-Үдын захиргаанай Эд зөөри ашаглалгын болон газар хэрэглэлгын хорооной түрүүлэгшэ Анастасия Кузовлева дуулгаба.
Тэрэнэй тэмдэглэһээр, аэропортын шууяанай бүһэ хизаарай, үертэ абтадаг, шанга зайн галай утаһанай хажуудахи гэхэ мэтын хорюултай газарнуудһаа бэшэ газарта табигдаһан гэрнүүдые хуулиин ёһоор дансалха арга олгогдобо.
- Улаан-Үдэдэ бүхы дээрээ энэ хуулиин хүсэндэ 500-аад гэр хабаадуулагдана. Илангаяа, тэдэ гэрнүүд зоной олоор байрлаһан – Мелькомбит тосхон, хотын түбэй оршон, Октябрьска район, Түмэр замай районой Аршан, Шишковка һуурингууд г.м. газарнуудаар бодонхой, - гээд Кузовлева онсоло тэмдэглээ.
Гэхэ зуура, зарим ушарта эрхэтэд гэрээ яашье дансалха аргагүй. Тиин, жэшээнь, хүсэндөө үлэһэн хуулиин дэмжэлгэдэ һаяхана буһалгаа үймөө татаһан «Солдатский» тосхондо оршодог «Цагаата» гэһэн СНТ нэгэдэлэй ажаһуугшад хүртэнэгүй. Тэдэнэй гэрнүүд элдэб хорюултай газар дээрэ тодхоотой, тиигээдшье булюу олонхинь 2003 оной һүүлээр баригдаа һэн. Тэдэ зон гансал шүүхын шиидхэбэринүүдые приставуудай гүйсэдхэлгые хойшолуулха тухай шүүхын хаяагаар хандаха аргатай.
Даачна гү, али сэсэрлигэй нэгэдэлнүүдые байгуулжа, 2001 оной октябрь болотор баригдаһан байшангуудые хуулиин ёһоор дансалха боломжо олгуулха зэргэтэй хэмжээ ябуулга республика дотор 2008 ондо зохёогдоо бэлэй. Тэдэ хэмжээ ябуулганууд табан ДНТ түхэлэй нэгэдэлдэ, мүн нэгэ СНТ-дэ 1211 ажаһуугшадай гэр, газарнуудые дансалха арга олгуулһан байна. Хэр тиигэбэшьень, энэ ябуулгые хуули хазагайруулагдана гэжэ прокуратура болюулаа һэн. Эрхэтэдэй газараа болон 2001 он болотор баригдаһан гэрээ ори ганса байрамни гэжэ хуулиин ёһоор дансалха арга олгуулһан Арадай Хуралда абтаһан хуулиие 2015 оной март соо прокуратура буруушаахые оролдоһон байгаа гээд һануулая.
