Буряадай Арадай Хуралые Һангай, налогай , мүнгэнэй болон банкнуудай талаар хорооной түрүүлэгшэ Цырен-Даши Доржиев энэ удаа толгойлбо. Тэрэнэй нэрээр хүртэмэ 32 дуунай урдаһаа 36 дуун ороһон байна. Берлинагай түлөө зургаан дуун үгтөө, Турбяновые 12 депутат дэмжээ. 4 бюллетень муудхаагдажа һалгагдаба.
Олоной альга ташалган доро Доржиев спикерэй шэрээ эзэлбэ.
- Минии түлөө олонхи дуунай үгтэһэндэ таларханаб. Парламентынгаа улам бэхижэхын тула бүхы шадалаа, эрдэм мэдэсэеэ, дуй шадабарияа зорюулхаб. Элүүр энхэ, аза талан, аша үрэтэй ажал та нүхэдтөө хүсэнэб. Баяраа мэдүүлнэб, - гэжэ тэрэ депутадуудта хандаба.
Цырен-Даши Доржиев Буряад уласай Яруунын аймагай Нарһата тосхондо 1962 оной апрелиин 20-до түрэһэн юм. 1984 ондо Буряадай хүдөө ажахын институт дүүргэжэ, «Сосновский» совхоздо зоотехнигээр ажаллаа. 1987 ондо Яруунын аймагай ВЛКСМ-эй хоёрдохи, удаань нэгэдэхи секретаряар томилогдоһон байна. 1989 ондо «Сосновский» совхоз толгойлбо. 1991 онһоо 1994 он болотор Яруунын аймагай Домна һууринда «Улаан Туяа» колхозай түрүүлэгшэ ябаа. 19994 ондо аймагайнгаа өөрын хүтэлбэри толгойлоо, удаань Арадай Хуралда һунгагдаба. Тиин парламентын нэгэдэхи, хоёрдохи, гурбадахи болон дүрбэдэхи зарлалай (1994-2013 онуудта) депутат ябаа. 2000 оной январьһаа – Арадай Хуралай Һангай, налогай, мүнгэнэй болон банкнуудай талаар хорооной түрүүлэгшэ. Буряад Уласай таряалангын согсолбориин габьяата ажалшан.
«Единая Россия» фракциин гэшүүн, Буряад Уласай Арадай Хуралай болон Монголой Уласын Ехэ Хуралай хоорондохи харилсаанай зүбшэлгын комиссиин гэшүүн, Буряад Уласай Арадай Хуралай дэргэдэхи Өөрын хүтэлбэриин зургаануудай түлөөлэлгын зүблэлэй гэшүн мүн.
Шагналнууд гэбэл, «Буряад Уласай таряалангын согсолбориин габьяата ажалшан» (1998); Буряад Уласай Хүндэлэлэй үнэмшэлгэ (2003); «Ородой Холбооной Уласай габьяата экономист» хүндэтэ зэргэ (2008).
