Буряад Уласай Толгойлогшо Алексей Цыденов жэл үнгэрһэнэй удаа ажалайнгаа хэрэгээр Кабанскын аймаг дахин хүрэбэ. Энэ удаа нютагай зонтой дүрбэн уулзалга үнгэргөө, бэрхэшээлнүүдыень шагнаа. Тэндэ омоли загаһа барилгын хоригдоһон тухай, ариг сэбэрэй талаар эрхэ байдал тухай болоод олзын хэрэг эрхилхэ тухай гэхэ мэтэ асуудалнууд соностобо. Хамагай дунда Цыденов өөрын олзын хэрэг яажа эрхилһэн тухайгаа залуушуулда хөөрэжэ үгэһэн байна.
Кабанскын аймагта олзын хэрэг эрхилэлгэ яһала урагшатайгаар нэбтэрүүлэгдэжэ байнхай. Байгша оной январиин 1-эй байдалаа налогой тоосоондо бага болон дунда зэргын олзо эрхилдэг 1597 эмхи тоологдоно. Тэдэнэй булюу олонхинь дээдэ һургуули дүүргэһэнэйнгээ һүүлээр нютагаа бусаһан залуушуул болоно. Тэдэ өөрын амжалтанууд тухай Алексей Цыденовта мэдээсэбэ. Тиигэжэ, илангаяа, залуушуул толгойлогшодо һайшаагдаа ха.
- Кабанскын аймаг эгээл ехэ аймагуудай нэгэн, танай залуушуул ехэтэ һайшаагдаба, эдэбхитэд олон, шуранууд, нюдэндөө галтайнууд. Тодо дурадхалнуудые оруулна, өөрын хүсөөр хэрэг ябуулна. Юумэниинь болоно. Илангаяа залуушуул аймагаа бодхооно, урагшань дабшуулна. Бидэ өөрын зүгһөө, яажа тэдэнээ гамнаха, дэмжэхэмнайб гэжэ бодомжолхо ёһотойбди, - гээд Цыденов хэлээ.
Залуушуулые дэмжэхэ хэмжээнүүд тухай Буряад Уласай Үйлэдбэриин болон худалдаа наймаанай яаман сайдай орлогшо Алексей Унгаев хөөрэжэ үгөө. Тэрэ эхилжэ байһан олзо эрхилэгшэдтэ болоод эндэхи Политехническэ техникумэй оюутадта гүрэнэй дэмжэлгэдэ хүртэлсэхын түлөө хэндэ хандаха хэрэгтэйб гэжэ ойлгуулаа. Залуушуул өөрын талаһаа уласай толгойлогшоһоо захяа үгэ дуулаха һанаатай байба.
- Минии захяа иимэ: ажаллагты, юумэнһээ айлтагүй. Болоогүй гээд голхоролтогүй, дүй дүршэлтэй болохонь юутэшьегүй. Ямарш хэрэгээ дүүргэхэ шухала, хахад харгыдаа хаялтагүй. Дууһан, хүсэдыень ойлгогты. Дүүргээгүйдэ юумэн мэдэгдэхэгүй. Бишье тиимэ дүршэл эдлэһэн байхаб. Хэзээ нэгэтэ манай хэрэг гурбан хүнһөө бүридхэгшэ һэн: захирал, бухгалтер, секретарь. Сайгаа уужа байхадаа, яаха тухайгаа хэлсэгшэ һэмди. 70 гаран дэмы туршалгаһаа, хэрэгнай һүүлэй һүүлдэ 2,5 мянган ажалшадтай, мүн 2005 ондо 12 тэрбүүмдэ шахаһан олзотой гаралсадаг одоо ёһотой бизнем боложо хүгжөө һэн. Теэд бүтөөгүй туршалганууд тоолошогүй олон байгаа. Нэгэниинь, хоёрынь, гурбадахинь, харин 10-дахи түсэл заабол «буудаха», эндэ гол шухалань гэбэл, гараа һула табихые сээрлэгты. Юундэб гэхэдэ, дуһал шулуу мүлидэг, - гээд Цыденов хэлээ.
