Үбэр Байгалай арадуудай угсаата зүйн музей тухай мэдээсэл аяншалагшадта зорюулагдаһан мэдээжэ хабсаргалтада буряад хэлэндэ оршуулагдаа. Восток-Телеинформгэһэн мэдээсэлэй агентствын сурбалжалагшада музейн захиргаанай дуулгаһаар, энэ ажал «Үндэһэн хэлэнүүдые ба угсаата соёлой шэглэлтэй бусад зүйл шудалалгые дэмжэхэ талаар Улас түрын «Бэлиг» түб» гэһэн гүрэнэй бюджедэй эмхи зургаанай Гүрэнэй оршуулгын албантай суг хамта бэелүүлэгдэнэ.
Музейн хэблэлэй албанай ойлгуулһаар, izi.TRAVEL гэһэн түсэл - гар утаһанай түлбэригүй аудиогид тухай хэлэгдэнэ. Тэрэнэй ашаар хэншье һонирхоһон сэдэбээр болон газарнуудаар аяншалгын хөөрөөнүүдые шагнаха аргатай. Тус хабсаргалта хэрэглэхэ гэбэл, сайтда орожо, хото шэлээд, аяншалгануудай тоолборитой танилсаха хэрэгтэй. Улаан-Үдэдэ хабаатай 15 элдэб янзын аяншалга даб дээрээ түсэлдэ оронхой. Энэ хадаа хотын гоё ба суута газарнууд тухай хөөрөөнүүд, һонирхолтой замууд, сэдэбтэ аяншалганууд болоно. Тэдэнэй дунда Угсаата зүйн музейн дэбисхэртэ оршодог гэрнүүдэй түүхэтэй танилсуулһан түсэл бии юм.
- Бидэ ород хэлэнэй хажуугаар буряад хэлэн дээрэ мэдээсэл нэмээбди. Мүнөө оньһоной талаар хэдэн асуудал шиидхэгдэжэ байна. Тэрэнэй һүүлээр энэ мэдээсэлтэй бүхы зон танилсаха аргатай. Энэ хадаа Угсаата зүйн музей тухай буряад хэлэн дээрэ түрүүшын онлайн-аяншалгануудай нэгэн болохо, - гэжэ музейн захиргаанда тэмдэглээ. – Манай һанамжаар, иимэрхүү түсэлнүүд ехэ удха шанартай. Юуб гэхэдэ, тэдэ буряад хэлэнэй дүүрэн хүсэндөө үүргэеэ дүүргэхынь тула хэлэнэй оршон байгуулха хэрэгтэ хубитаяа оруулна.
Музейдэ мэдээсэлэй хабтаһануудые буряад хэлэндэ оршуулха талаар ехэ ажал ябуулагдана гэжэ Восток-Телеинформ энээнһээ урид мэдээсээ һэн гэжэ тэмдэглэе. Мүнөө музейн амитадай буланда байдаг бүхы амитадай нэрэнүүд, мүн хотын хэсэгэй дэбисхэр дээрэхи мэдээсэлэй хабтаһанууд оршуулагданхай. Даб дээрээ буряад хэсэгэй мэдээсэлэй хабтаһанууд оршуулагдажа байна.
