Улаан-Үдэ хотодо Буряад хэлэнэй габшагай һарын хэмжээндэ «Буряад хэлэн ба буряад уран зохёол» гэһэн үзэхэ зүйлнүүдээр нютагай засагай түбэй үргэдхэмэл зүблөөн онлайн-түхэлөөр үнгэрбэ гэжэ Восток-Телеинформ бэшэнэ.
Зүблөөн һургуулинуудта буряад хэлэ шудалалгын бэрхэшээлнүүдтэ ба саашанхи хараа түсэбүүдтэ зорюулагдаа. Хэмжээ ябуулгада һургуулинуудай захиралнуудай һуралсалай ажалай талаар орлогшонор, буряад хэлэнэй багшанар, Буряадай гүрэнэй Доржо Банзаровай нэрэмжэтэ ехэ һургуулиин Буряад хэлэ сахин хүгжөөлгын түбэй захирал Александр Елаев, Улаан-Үдэ хотын Захиргаанай Болбосоролой талаар хорооной болон Болбосоролой саг үргэлжэ шалгалтын ба хүгжэлтын түбэй мэргэжэлтэд хабаадаа.
Буряадай улас түрын болбосоролой бодолгын дээдэ һургуулиин ректор Владимир Цыренов, «Бэлиг» түбэй захиралай орлогшо, Буряад хэлэ хүгжөөхэ талаар улас түрын түбэй хүтэлбэрилэгшэ Оюна Забанова хабаадагшадые амаршалаа. Тус түбэй ахамад мэргэжэлтэн Бадмажаб Будаин бүхыдөө уласта 2021 - 2022 онуудай һуралсалай жэлдэ буряад хэлэ заалга тухай элидхэл хээ. Улаан-Үдэ хотын һургуулинуудта буряад хэлэ шудалалга, тэрэнэй шэнжэлэл болон саашанхи хүгжэлтын зорилгонууд тухай Болбосоролой саг үргэлжэ шалгалтын ба хүгжэлтын түбэй таһагай дарга Наталья Вставская элидхээ. Улаан-Үдэ хотын 49-дэхи дунда һургуулиин багша Елена Дашидондокова үхибүүдэй хүгжэлтэдэ хэшээлһээ гадуур ажал ябуулгын үзүүлдэг нүлөө тухай хөөрөө.
Буряад хэлэ заабол сахин хүгжөөлгэ, ангинуудые бүлэгүүдтэ хубаан, буряад хэлэ долоон хоногой хоёр саг үзүүлэлгэ, тэрэниие заалгын шанар дээшэлүүлгэ, хүүгэдые һургаха мүнөө үеын болбосоролой оршон байгуулалга – эдэ бүгэдэ асуудалнууд зүбшэн хэлсэгдээ.
