Арадай Хуралай гэшүүд Кыргызстанай ниислэл Бишкек хотодо үнгэрһэн “Хапсагай” гэһэн яхад барилдаагаар дэлхэйн абаргые шалгаруулха тэмсээндэ оролсожо ерэһэн барилдаашадые хүндэдхэхэ ёһолол үзүүлбэ. Арадай Хуралай түрүүлэгшын үүргэ саг зуура гүйсэдхэгшэ Баир Гармаев тамиршадые амаршалаад, тэдээндэ дурасхаалай бэлэгүүдые барюулаа.
Сангади Ульзетуев ба Аюр Нимаев хоёр тэмсээнэй хүрэл медальда хүртөө. Хоюулаа ХОУ-гай спортын мастерай нэрэ зэргэтэй. Харин Захааминай барилдаашан Сандан Гармаев яхадай тамиршаниие диилэжэ гараад, 75 кг шэгнүүртэ абарга бүхэ болоо. Арадай Хуралай гэшүүн Геннадий Доржиев өөрын мүнгэнһөө барилдаашадта нэрэтэ стипендинүүдые түлэхөөр болоо. 30 мянган түхэригөөр тэдэнэр спортын нэг халаанай туршада абажа байха.
- Буряадууд “Хапсагай” барилдажа шадаха гэжэ булта мэдэхэ болоо, хүсэ шадалаа харуулаа. Ондоо гүрэнүүдтэ буряад хүн абарга болоо гэжэ мэдээ. Энэ ехэ амжалта болоно. Яхадай абаргада зорюултатай бриллиантатай болон үндэһэнэй тэмдэг гоёолтотой бүһэ тэдэнэр бүтээһэн байгаа, харин манай тамиршан тэдэниие илажа гараа бшуу, - гэжэ үндэһэ яһанай харилсаанай, залуушуулай бодолгын, ниитын болон нютаг можын нэгэдэлнүүдэй талаар хорооной түрүүлэгшэ Виталий Лыгденов хэлээ.
