Декабриин 8-да үнгэргэгдэһэн Арадай Хуралай Зүблэлэй суглаан дээрэ олон квартиратай гэрнүүдтэ байдаг зоной бултанда хабаатай зөөри һэльбэн заһабарилга тухай хуулиин хэр бэелүүлэгдэжэ байһан тухай хөөрэлдөөн болобо. «Капитальна заһабарилгын жаса» гэһэн олзо эрхилгын эмхиин нөөсэ хэрэгсэлнүүдые шалгаха тухай Тоололгын палатын тогтоолые баталжа абахаар Эдэй засагай, байгаалиин нөөсэ ашаглалые болон оршон тойронхиие хамгаалалгын хороон баадхагдаһан байна. Тус хадаа 2014-2016 онуудта ябуулһан ажалыень шалгалта мүн болоно, тиин 2017 оной түрүүшын кварталда үнгэргэгдэхэ жэшээтэй.
Капитальна заһабарилга тухай хууляар хараалагдаһан улас түрын заршам дотор дүн хамта 7,4 сая дүрбэлжэн метр талмайтай олон байратай 4194 гэр оруулагданхай. 2015 оной богони болзорой түсэб дотор юһэн аймагай 54 гэр ороһон байгаа. Энэ хэрэгтэ 95,1 сая түхэриг шэглүүлэгдээ һэн. 2016 ондо 18 аймагай 183 байра заһабарилха гээд түсэблэгдэһэн байба. Эндэ хамта дээрээ 467 сая түхэриг һомологдохо зэргэтэй һэн. Гэбэшье, оройдоол 8 гэртэ заһабарилга дүүргэгдээ, зүгөөр үшөө 55 гэр дүүргэгдэхэ ёһотой, тиихэдэ 157 байрада түсэлэй дансанууд зохёогдонхой.
Иигээд абахада, депутадуууд Барилгын болон гэр байрын ажахы шэнэлэлгын яаманай, мүн тиихэдэ олон квартиратай гэрнүүдэй хамтын зөөриие капитальнаар заһабарилгын жасын нютагуудай өөһэдын хүтэлбэринүүдтэй, хүтэлбэрилхы эмхинүүдтэй болоод гэрэй эзэдтэй харилсажа, ажалаа зохёохо талаар хүсэд хүдэлнэгүй гээд тэмдэглэнэ. Тэрэшэлэн, түсэлэй дансануудые зохёолго унжагайруулагдана. Эдэ бүгэдэ шалтагаанууд олонхи гэрнүүдтэ барилга-хабсаргалтын ажалнуудые хойшолууна. Юрэдөө, жасада мэдүүлһэнэй ёһоор, гэрнүүдэй бодото шанар данса саарһануудта харуулагдаһанһаа һураггүй ондоо байшана. Энэ мүн лэ харша шалтаг болоно.
